धनगढी, ३० साउन । कैलाली जिल्ला अदालतले चर्चित टीकापुर घटना मुद्दाका वादी र प्रतिवादी दुवै पक्षको साक्षी अदालतमा पेश गर्ने आदेश जारी गरेको छ ।

                घटनाको करिब तीन वर्षपछि बुधवार भएको पहिलो पेशीमा जिल्ला न्यायाधिश परशुराम भट्टराईको एकल इजलासले दुवै पक्षको साक्षी अदालतमा पेश गर्ने आदेश जारी गरेको हो । अदालतले वादी पक्षको साक्षी जिल्ला वकिलको कार्यालय मार्फत र प्रतिवादी पक्षको साक्षी निजहरुमार्फत नै अदालतमा उपस्थित गराउने आदेश जारी गरेको कैलाली जिल्ला अदालतका स्रेस्तेदार इन्द्रबहादुर कठायतले जानकारी दिए ।

                थरुहट÷थारुवान आन्दोलनको क्रममा २०७२ साल भदौं ७ गते टीकापुरमा हिंसात्मक झडप हुँदा आठ सुरक्षाकर्मी र एक बालक सहित नौ जनाको ज्यान गएको थियो । सरकारले ५८ जना विरुद्ध कर्तव्य ज्यान, ज्यान मार्ने उद्योग र डाँका चोरी मुद्दा लगाएको छ । मुद्दा लागेका मध्ये ३२ जना अझैसम्म फरार छन् भने पक्राउ परेका २६ जनामध्ये २३ जनालाई कैलाली कारागारमा, सांसद् रेशम चौधरीलाई काठमाण्डौंमा र दुई जना नाबालकहरुलाई सुधार गृह पोखरामा राखिएको छ ।