नसर्ने रोगको विरामी बढ्दै
धनगढी, भदौ २४ गते । कैलालीमा नसर्ने रोगको विरामी बढेका छन् । शारीरिक परिश्रम नगरी अरामदायी जीवनयापन गर्ने र खानपानमा ध्यान नदिने परिपाटीले मानिसहरु नसर्ने रोगबाट आक्रान्त हुन थालेका हुन ।
यो जिल्लामा नसर्ने रोगबाट बर्सेनि धेरै मानिस पीडित भइरहेको जिल्ला जनस्वास्थ्य कार्यालयले जानकारी दिएको छ । मुटु, मृगौला, क्यान्सर, सिकलसेल जस्ता नसर्ने रोगका विरामी बढ्दै गएको जनस्वास्थ्य निरीक्षक महेश चन्दले जानकारी दिए । नसर्ने दीर्घ रोगका विरामीहरु बढेसंगै एक लाख रुपिया बराबरको उपचार सेवा लिनेको सङ्ख्या पनि बढेको छ ।
जिल्ला जनस्वास्थ्य कार्यालयका अनुसार गत आर्थिक वर्ष २०७४÷०७५ मा मुटुको समस्या भएका १२१, क्यान्सर लागेका १७३, मृगौला समस्या भएका ८६ जनाले निःशुल्क उपचारका लागि सिफारिस लिएका छन् । यसैगरी, वङ्शाणुगत सिकलसेल एनिमिया रोग लागेका १११ र टाउकोमा गम्भीर चोट लागेका १० जनाले निःशुल्क उपचारको सेवा लिएका छन् ।
चालू आर्थिक वर्षको डेढ महिनामा क्यान्सरबाट पीडित ३० र सिकलसेल एनिमिया लागेका १६ जनाले निःशुल्क उपचारको लागि सिफारिस लिएका छन् । विविध कारणले मुटु, क्यान्सर जस्तो समस्या देखिए पनि खानपान र आनीबानीमा सुधार हुन नसक्नु प्रमुख कारण रहेको जनस्वास्थ्य निरीक्षक चन्दले बताए ।
‘मान्छेले होटलमा तारेको, फुटफाटमा बेचिने चिल्लो खानेकुरा खाने बानी बढी छ । लगातार मासु नै मासु खाने पनि गर्छन् ।’, उनले अगाडि थपे–‘यस्ता खानेकुरामा पाइने ट्रान्सफ्याटले मानवीय स्वास्थ्यमा गम्भीर समस्या आइरहेको छ ।’ अहिलेको मानव जीवन बिलासी हुनुका साथै अल्छी भएका कारणले नसर्ने दीर्घ रोगले आक्रान्त भइरहेको चन्दको भनाइ छ ।
नसर्ने तर, खतरनाक दीर्घ रोगहरुकाबाट बच्नका लागि मानिसले आनीबानीमा सुधार गर्न आवश्यक रहेको जिल्ला जनस्वास्थ्य कार्यालयका प्रमुख टङ्कप्रसाद चापागाइँ बताउँछन् । ‘मान्छेले खानपानमा सुधार गर्नुका साथै शारीरिक व्यायाममा ध्यान दिन आवश्यक छ’, उनले भने–‘विलासी जीवनशैलीले समस्या निम्त्याइरहेको छ ।’
नसर्ने रोग न्यूनीकरणका लागि नेपाल सरकारले नसर्ने रोग सम्बन्धी कार्यक्रम (प्यान) सञ्चालन गर्दै आएको छ । यद्यपि, बिलासी र आरामदायी जीवनयापनका कारण विरामी बढ्दै गएका छन् ।
नसर्ने रोगबाट जोगिनका लागि खानपानमा ध्यान दिन अत्यन्त जरुरी रहेको सेती अञ्चल अस्पतालका मेडिकल सुपरीटेण्डेन्ट डा. हेमराज पाण्डेयले बताए ।
तपाईको प्रतिक्रिया