डोटी, १६ असोज । डोटीको दिपायल सिलगढी नगरपालिकाको वडा नम्बर १ तिखास्थित वडा कार्यालयमा तालाबन्दी गरिएको छ  । राजनीतिक पूर्वाग्रहका आधारमा कर्मचारीहरूको सरुवा गरेको भन्दै वडा कार्यालयमा चार दिनदेखि तालाबन्दी गरिएको छ ।

तालाबन्दीले वडाको काम प्रभावित भएको छ । १३ वर्षसम्म वडासचिवको काम गर्दै आएका स्थानीय बुद्धिसिंह खड्कालाई वडा ८ लडागडामा सरुवा गरिएको छ  । नगरपालिकाको भदौ ३० गते बसेको कार्यपालिका बैठकले उक्त निर्णय गरेको थियो ।

वडा ८ लडागडामा वडासचिव लालबहादुर कठायतलाई भने सोही वडामा नै काम गर्न भनिएको छ । यस्तै वडा २ मा वडासचिवको काम गरिरहेका लोकबहादुर कठायतलाई वडा १ मा सरुवा गरिएको छ । वडा २ मा भने जिल्ला समन्वय समितिबाट नगरपालिकामा सरुवा भएर आएकी सुशीला श्रेष्ठलाई खटाइएको छ ।

सरुवा गरिएका ४ वटै वडासचिव कांग्रेस निकट मानिन्छन । छानी–छानी कांग्रेस निकट कर्मचारीलाई मात्र दुख दिने नियतले सरुवा गरिएको कांग्रेसबाट निर्वाचित वडा ४ का वडाध्यक्ष वीरेन्द्र शाहले बताए । राजनीतिक पूर्वाग्रह राखेर स्वास्थ्यका अन्य कर्मचारी पनि सरुवा गरिएको उनले बताए ।