फरक क्षमता भएका बालबालिका पढाइबाट वञ्चित
अछाम, १६ असोज । फरक क्षमताका बालबालिका पढाइबाट वञ्चित हुने गरेका छन् । अपांगता भएका बालबालिकाका लागि छुट्टाछुट्टै ठाउँमा कक्षा सञ्चालन गरिए पनि सबै जनाले पढ्न पाएका छैनन् ।
बहिरा बालबालिकाका लागि बयालपाटास्थित महेन्द्र मावि, दृष्टिविहीनका लागि सदरमुकाम नजिककै षोडषा मावि र बौद्धिक अपांगता भएकालाई विनायकको विद्यामन्दिर माविमा पढाउने व्यवस्था गरिएको छ । यी तीन वटै विद्यालयमा १० जनाभन्दा बढी विद्यार्थी भर्ना गरेर पढाउन सक्ने अवस्था भने छैन ।
१० जना विद्यार्थी कोटा तोकिएको भए पनि अहिले १२ जना बौद्धिक अपांगताका भएका बालबालिकालाई भर्ना गरेको विद्यामन्दिर माविका प्रधानाध्यापक बीरबहादुर शाहले बताए । धेरै बालबालिका सम्पर्कमा आउँने भए पनि स्रोत र साधनको अभावले भर्ना लिन नसकिएको उनले बताए ।
यो वर्षमात्र धेरै विद्यार्थीलाई भर्ना नगरेरै फर्काउनु परेको शाहको भनाइ छ । सुत्ने कोठा र खाने व्यवस्था नहुँदा सबैलाई एकै कोठामा व्यवस्थापन गर्न बाध्य भएको उक्त विद्यालयका व्यवस्थापन समिति अध्यक्ष टेकबहादुर शाहीले बताए ।
‘६ जना छात्रा र ६ जना छात्रलाई एकै कोठामा राख्नु परेको बताउँदै उनले ७ देखि १५ वर्ष उमेरका छात्र र छात्रालाई एकै कोठामा बसाउँदा निम्तिन सक्ने जोखिम धेरै रहेको बताए । १२ जना बौद्धिक अपांगता भएका बालबालिकाका लागि अहिले १ जना रेखदेख गर्ने र १ जना शिक्षक कार्यरत रहेका छन् ।
फरक क्षमता भएका बालबालिका कुनै सरकारी कार्यालय वा शैक्षिक अभियान्ताको नजरमा पर्न नसक्दा विद्यालय देख्न नपाएको शिक्षक टोपबहादुर कडायतले बताए ।
तपाईको प्रतिक्रिया