‘सहकारीमार्फत समृद्धि सम्भव’
धनगढी, २८ असोज । कैलालीको धनगढी उपहानगरपालिका वडा नम्बर ७ मा रहेको नवज्योती सहकारी संस्थाको १० औं वार्षिक साधारण सभा शनिवार सम्पन्न भएको छ ।
उक्त कार्यक्रममा बोल्दै धनगढी उपमहानगरपालिकाका प्रमुख नृपबहादुर वडले सहकारी संस्थाहरु समृद्धिको आधार रहेको बताए । उनले सबैको सहकारीमा पहुँच वृद्धि गर्न आवश्यक रहेको बताए । नगर प्रमुख वडले भने–‘ठूला बैंकहरुमा सबै नागरिकको पहुँच हुँदैन त्यसको विकल्पको रुपमापनि सहकारी संस्थाहरु रहेका छन् ।’ सहकारीहरुले व्यावसायिक कृषि क्षेत्रमा लगानी गर्नु पर्ने वडको भनाइ थियो । उनले भने–‘जे गरेर जनताको जिवनस्तरमाथि उठ्न सक्छ, त्यसमा लगानी केन्द्रित हुनु आवश्यक छ ।’ नगरप्रमुख वडले शेयर सदस्यहरुमा बचत गर्ने बानीको विकास गर्नका लागि सहकारी शिक्षा आवश्यक भएको बताए ।
नवज्योती सहकारी संस्थाका अध्यक्ष सीताराम रानाले हरेक शेयर सदस्यको पैसाको सुरक्षा गर्ने जिम्मेवारी आफूहरुको रहेको बताए । उनले भने–‘छोटो समयमै राम्रो सफलता पाएका छौं । यो सबै शेयर सदस्यहरुको सहयोगबाट सम्भव भएको हो ।’
जिल्ला सहकारी संघ कैलालीका अध्यक्ष विश्वप्रकाश पौडेलले अहिले सहकारी सम्बन्धी नयाँ ऐन आइसकेकाले यसको बारेमा सबैले जानकारी राख्नुपर्ने बताए । नेपाली कांग्रेस धनगढी उपमहानगरपालिका–७ का सभापति देवबहादुर सेठीले नवज्योती सहकारी संस्थालाई व्यवस्थित बनाउँदै लैजाने बताए । उनले भने–‘एउटा घरको छतमा बसेर केहि व्यक्तिले संचालनमा ल्याएको सहकारी अहिले व्यापक भएको छ । एक वर्षभित्रै सहकारीको आफ्नै संरचना बनाउनेछौं ।’
तपाईको प्रतिक्रिया