निर्माणाधीन ६ लेन सडकबाट विद्युत पोल हटाइदैँ
अविनाश चौधरी,
धनगढी, २९ असोज । कैलालीमा निर्माणाधीन मोहनापुल–अत्तरिया छ लेन सडक निर्माण कार्यमा समस्या गरेको विद्युत पोल हटाउने कार्य धमाधम भइरहेको छ ।
विद्युत पोल हटाउने जिम्मेवारी पाएको राजेन्द्र निर्माण सेवाले अहिलेसम्म दुई खण्डमा रहेको एकातिरको विद्युत पोल र तार हटाउने कार्य अन्तिम चरणमा पुगेको जनाएको छ । अर्कोतिर भने पोल र तार हटाउने कार्य पूर्ण रुपमा बाँकी रहेको छ ।
विद्युत प्राधिकरणले बेलैमा विद्युत ‘सट डाउन’ गरेर सहयोग गरेमा अबको एक÷डेढ महिनामै विद्युत पोल र तार हटाउने कार्य सम्पन्न गर्ने लक्ष्य रहेको राजेन्द्र निर्माण सेवाका प्रमुख कार्यकारी अधिकृत रोशन भट्टले बताए ।
‘एकातिरको पोल र तार हटाउने कार्य लगभग ९० प्रतिशत पूरा भइसकेको छ’, उनले अगाडि थपे–‘अर्कोतिर भने पूर्ण रुपमा बाँकी छ । तर, नेपाल विद्युत प्राधिकरणले समयमै विद्युत सट डाउन गरेर सहयोग गरेमा पोल र तार हटाउन अब बढीमा डेढ महिनासम्म लाग्नेछ ।’
निर्माणाधीन ६ लेन सडक क्षेत्रमा रहेका अन्य भौतिक संरचना भत्काउने र हटाउने कार्य भने सम्पन्न भइसकेको छ । धनगढी उपमहानगरपालिका र गोदावरी नगरपालिकाको पहलमा घर, टहरा जस्ता संरचना हटाइएको थियो ।
विद्युत पोल र तारहरु पूर्ण रुपमा नहटाइएसम्म दू्रत गतिमा काम गर्न भने बाधा पुग्ने निर्माण कम्पनीले बताएका छन् । विद्युतीय संरचना पूर्ण रुपमा हटाउने कार्य सम्पन्न नभएकाले अहिलेसम्म नाली, कल्भर्ट, ड्रेन निर्माणको कार्य भइरहेको जनाइएको छ ।
मोहनापुलदेखि अत्तरिया बजारको चौकसम्म १४ दशमलव २ किलोमिटर लम्बाई रहेको ६ लेन सडक क्षेत्रमा घर, टहरा, खोका, रुख, विद्युत र टेलिफोनको पोल तथा तारहरु रहेको थियो ।
यसैबीच, ६ लेन सडक निर्माणको कार्य पनि जारी रहेको छ । अब चाडपर्व आइसकाले चार÷पाँच दिन पर्वको विदा गरेर निर्माण कार्यलाई पुनः तदारुकताका साथ अगाडि बढाउने प्रमुख कार्यकारी अधिकृत भट्टले जानकारी दिए ।
यसअघि, भएको पटक–पटकको अवरोधले निर्माण कार्य द्रूत गतिमा अगाडि बढ्न सकेको थिएन । दुई वर्ष निर्माण अवधि रहेको मोहनापुल–अत्तरिया ६ लेन सडकको निर्माण कार्यमा एक वर्षभन्दा बढी समय खर्च भइसकेको छ । हालसम्म सडक निर्माणको आधाभन्दा बढी काम भइसकेको मोहनापुल–अत्तरिया ६ लेन सडक निर्माण आयोजनाले जानकारी दिएको छ ।
विक्रम सम्वत २०७४ जेठ महिनाबाट निर्माण कार्य सुरु गरिएको थियो । तर, ६ लेन सडक क्षेत्राधिकारमा परेका भौतिक संरचना हटाउन ढिलाइ हुँदा काममा पनि ढिलाइ भएको थियो । संरचना हटाउने कार्यको सुरुवातमै केहि घरजग्गा धनीले सर्वोच्च अदालतमा मुद्दा समेत हालेपछि केहि समय काम नै ठप्प भएको थियो ।
अवरोध हटेसंगै निर्माण कार्यले गति लिए पनि सडक निर्माणको कार्य भने तोकिएको समय सीमामा पूरा नहुने लगभग निश्चित रहेको जनाइएको छ । चार÷पाँच महिना काम नभएकाले तोकिएको समयमा सडक निर्माण सम्पन्न गर्न नसकिने अवस्था देखिएको आयोजनाका सव इञ्जिनीयर भूपेन्द्र बडालले जानकारी दिएका छन् । ‘यो सडकलाई सम्पन्न गर्न केहि समय थप गर्न आवश्यक हुन सक्छ’ उनले भने ।
कुल एक अर्ब ६८ करोड रुपिया लागतमा निर्माण हुने यो सडकको निर्माण कार्य तीन खण्डमा विभाजन गरी भइरहेको छ । शून्यदेखि ४ दशमलव ५ (साढे चार) किलोमिटर दूरीको पहिलो खण्डमा शर्मा÷अम्मर÷नागार्जुन जेभीले निर्माणको काम गरिरहेको छ । यी निर्माण कम्पनीले भ्याट सहित ५८ करोड १७ लाख १६ हजार रुपियामा ठेक्का पाएका छन् ।
यस्तै, साढे चार किलोमिटर नै दूरी रहेको (साढे चारदेखि नौ किलोमिटर) दोस्रो खण्डमा ५२ करोड १४ लाख ३९ हजार रुपियामा ठेक्का पाएर लुम्बिनी÷राजेन्द्र÷डाँफे जेभीले काम गरिहेका छन् । ५ दशमलव २ किलोमिटर दूरी रहेको (नौदेखि १४.२ किलोमिटर) तेस्रो खण्डमा ५८ करोड ३३ लाख ११ हजार रुपियामा लामा÷राजेन्द्र÷डाँफे जेभीले काम गरिरहेका जनाइएको छ । ६ लेन सडक निर्माण भएमा आवतजावतमा धेरै सहज हुने बताइएको छ ।
तपाईको प्रतिक्रिया