धनगढी, ३१ असोज । जिल्ला हुलाक कार्यालय कैलालीमा कार्यरत श्रेणीबिहीन हल्कारा र डाँक बाहक हुलाकीले वर्षात्को बेला पाइने छाता, झोला र बर्षादी नपाएको गुनासो गरेका छन् ।

                विभागबाट आफूहरुले पाउने यो सुविधा गत आर्थिक वर्षकै नपाएको उनीहरुको गुनासो छ । ‘यो सामग्री हामीहरुले जेठ महिनामै पाउनु पर्ने हो’, हल्कारा मदनराज अवस्थीले भने–‘तर, अहिलेसम्म पाएका छैनौं ।’ वर्षात्को समयमा चिठीपत्र, ढुवानी कार्यको लागि हल्कारा र हुलाकीलाई विभागबाटै यो सुविधा उपलब्ध हुने गरेको छ ।

                जिल्ला हुलाक कार्यालय कैलालीका प्रमुख मेनका श्रेष्ठले छाता, झोला र बर्षादीका आएको बजेट कार्यालयको आवश्यक सामग्री खरिदमा खर्च भएकाले दिन नसकिएको बताइन् । उनले भनिन्–‘दोस्रो पटक पुनः बजेट माग गर्दै विभागलाई पत्र पठाएका थियौँ । तर, बजेट नदिएपछि किन्न नसकिएको हो ।’ उनले चालू आर्थिक वर्षको बजेटबाट उक्त सामग्री खरिद गरिने बताइन् ।

                हल्कारा र हुलाकीहरुले आफूहरुले पाउनु पर्ने सुविधा उपलब्ध गराइ दिन माग गर्दै जिल्ला प्रशासन कार्यालयमा निवेदन समेत दिएका थिए । यहि विषयलाई लिएर जिल्ला प्रशासन कार्यालयमै हल्कारा, हुलाकी र कार्यालय प्रमुखबीच भनाभन समेत भएको थियो । उनीहरुबीच, आरोप प्रत्यारोप पनि भएको छ । १७ जना हल्कारा, हुलाकीले कार्यालय प्रमुखले आफूहरुलाई थिचोमिचो गरेको आरोप लगाएका छन् ।

                तर, प्रमुख श्रेष्ठले कर्मचारीहरु आफूमाथि पूर्वाग्रही ढंगले आरोप लगाएको दावी गरेकी छिन् । उनले भनिन्–‘उनीहरु पूर्व योजनाका साथ म विरुद्ध लागेका छन् । म माथि गोलाबाट आएका माहुरी जस्तै खनिएका थिए ।’

                हल्काराहरुले झोला, छाता नपाएको भन्दै अख्तियार अनुसन्धान आयोगमा पनि उजुरी दिएका थिए । हुलाक कार्यालय जिल्ला प्रशासन कार्यालयमार्फत त्यसको जवाफ पठाइ सकेको जनाएको छ ।