धनगढी, ७ मंसिर । गोल्डेन स्टार मल्टिमिडिया प्रालि पोखराको आयोजनामा नेपाल गोल्डेन आइडल सिजन ६ आयोजना हुने भएको छ । विगतमा पोखरामामात्रै अडिसन हुने आइडलको यस वर्ष देशव्यापी अडिसन हुने बिहीवार धनगढीमा पत्रकार सम्मेलन गरी जानकारी दिइएको छ । देश भरीको प्रतिभाहरुलाई समेट्नका लागि देशव्यापी अडिसन गर्न लागेको जनाइएको छ ।

                धनगढीमा पुस ६ र ७ गते अडिसन हुने सुप कला प्रतिष्ठान कैलालीका अध्यक्ष अम्बिकाप्रसाद आचार्यले जानकारी दिए । उनले प्रदेशबाट छानिएका प्रतिभाहरुको फाइनल अडिसन पोखरामा हुने जानकारी दिए । कैलालीको हकमा इच्छुकले धनगढी, अत्तरिया, टीकापुर, लम्की र कञ्चनपुरको हकमा महेन्द्रनगर, बेलौरी, आइबीआरडी र पुनर्वासमा फाराम भर्न सकिने जनाइएको छ । 

                पहाडी क्षेत्रबाट आएका प्रतिभाहरुलाई अडिसनकै दिन कार्यक्रम स्थलमै फाराम भर्न सकिने व्यवस्था समेत रहेको पत्रकार सम्मेलनमा जनाइएको छ । आइडलमा जुनसुकै उमेर समूहका व्यक्तिले सहभागिता जनाउन सक्ने प्रतिष्ठानका सचिव गुणाकर पनेरुले जानकारी दिए । आइडल विजेतालाई १० लाख रुपैया पुरस्कार दिने जनाइएको छ ।