धनगढी, ६ फागुन । कैलालीको धनगढीमा रहेका होटलहरुमा पर्यटकको चहलपहल बढेको छ । खेल पर्यटनको माध्यमले यहाँ व्यापार, व्यवसाय राम्रै फष्टाएको हो । प्रदेशको आर्थिक ‘हब’ को रुपमा चिनिने धनगढीमा अहिले मोफसलकै प्रतिष्ठित रुस्लान धनगढी प्रिमियर लिग क्रिकेट प्रतियोगिता चलिरहेको छ । क्रिकेट खेलका कारण आधा महिनासम्मका लागि यहाँ रहेका ठूला तथा मध्यम होटलहरु पाहुनाले भरिएका छन् । द होटल डिभोटी, द रुबस होटल, फ्लोरा, होटल साथी, जलसा लगायतका होटलहरुमा भीडभाड बढेको छ । आन्तरिकसहित केही विदेशी पाहुना पनि धनगढी केन्द्रित भएका छन् ।

                धनगढीमा धेरै पाहुना भित्रिएकाले ‘सिजन’ सकिने बेलामा होटल व्यवसाय फष्टाएको कैलाली होटल व्यवसायी सङ्घका अध्यक्ष कलमबहादुर बमले बताए । ‘एउटा स्तरका होटलहरु पूर्ण रुपमा प्याक भएका छन्’, उनले भने–‘यसका साथै, व्यापार, व्यवसाय राम्रो भइरहेको छ ।’

                खेल पर्यटनले होटलमामात्र नभइ किराना पसलदेखि ठेलामा सञ्चालित नास्ता पसलमा समेत व्यापार, व्यवसाय बढेको बताइएको छ । मान्छेको भीडभाडले आर्थिक गतिविधि चलायमान भएको व्यवसायीहरुको ठहर छ । धनगढीमा खेल सञ्चालन भएपछि विभिन्न व्यापार व्यवसायमा सकारात्मक असर परेको अध्यक्ष बम बताउँछन् ।

                ‘यो व्यवसाय सुस्ताउने बेला हो । यद्यपि, अहिले फेरी विजनेस बढेको छ’, उनले भने–‘प्रायः सबै होटलहरुमा चहल पहल राम्रै भएको छ ।’ खेल पर्यटनले विभिन्न व्यापार, व्यवसायमा अत्यन्त सकारात्मक प्रभाव पारेको अध्यक्ष बमको ठम्याइ छ ।

सङ्घका अनुसार धनगढीमा रेस्टुरेन्टसमेत गरी साना–ठूला झन्डै एक हजार होटल सञ्चालमा छन् । ती सबै होटलहरुमा कारोबार राम्रो भइरहेको बताइएको छ । यसैगरी, भीआइपी, खेलकुदप्रेमी, कलाकार लगायतको आउजाउले गर्दा धनगढी विमानस्थलमा पनि यात्रुको चाप बढेको छ ।

हवाईमार्ग भएर दैनिक विभिन्न व्यक्तिहरुको आउजाउ भइरहेको छ । भने, खेलाडी, अफिसियल, टिमसंग सम्बन्धित व्यक्ति लगायत गरी एक हजारभन्दा बढी पाहुना धनगढीमा भित्रिएका छन् । धनगढी प्रिमियर लिग क्रिकेट प्रतियोगिता सञ्चालन भइरहँदा यहाँका सबै होटलहरुमा पाहुना बस्ने व्यवस्था गरेको आयोजक धनगढी क्रिकेट एकेडेमीले जानकारी दिएको छ ।

‘कुनै होटलमा खेलाडी, कुनैमा अफिसियल, भीआइपीहरुलाई बसाएका छौं’, एकेडेमीका अध्यक्ष सुवाश शाहीले भने–‘प्रायः सबै होटलहरुमा अहिले प्याक भएका छन् ।’

खेल पर्यटनले लगभग सबै क्षेत्रलाई छुने गर्दछ । खेलाडीहरु मैदानमा खेले पनि उनीहरुको बसोबास र खानपानको व्यवस्था होटलमा गरिएको हुन्छ । यसैगरी, खेलाडी र दर्शक बोक्नका लागि यातायात क्षेत्र पनि जोडिएको छ । रिक्सा मजदुरदेखि ज्यालादारीमा काम गर्ने व्यक्तिले सीमित अवधिका लागि रोजगारी प्राप्त गरेका छन् । क्रिकेट प्रतियोगिताकै लागि मैदान निर्माण लगायतको कार्यमा धेरैले विगत तीन महिनाबाट काम पाएका छन् ।

समग्र आर्थिक विकासको लागि खेल पर्यटन एक सशक्त माध्यम रहेको एकेडेमीका अध्यक्ष शाहीको बुझाइ छ । ‘यहाँ स्टेडियम बनाउने हो भने धेरै चिज गर्नै पर्दैन’, उनले अगाडि थपे–‘खेल पर्यटनलेमात्रै सुदूरपश्चिमको समृद्धिमा ठूलो सहयोग हुनेछ । विकासका लागि खेलभन्दा सशक्त अरु कुनै माध्यम हुनै सक्दैन ।’ डीपीएले फाप्ला अन्तर्राष्ट्रिय स्टेडियम बनाउन ठूलो सहयोग पुग्ने विश्वास गरिएको छ । यहाँ अन्तर्राष्ट्रिय रंगशाला निर्माण भएमा आर्थिक गतिविधिले झनै फड्को मार्ने क्रिकेट प्रतियोगिता आयोजक पक्षको विश्वास छ ।

धनगढीको फाप्ला क्रिकेट मैदानलाई राम्रो बनाउन सकिएमा यहाँ आर्थिक रुपमा कायापलट गर्न सकिने अवसरहरुको सृजना हुने बताइएको छ । धनगढी प्रिमियर लिग, सुदूरपश्चिम महोत्सव जस्ता वर्षमा भइरहने गतिविधिले व्यापार, व्यवसाय फष्टाउनमा ठूलो सहयोग पुगेको कैलाली उद्योग वाणिज्य सङ्का अध्यक्ष पुष्पराज कुँवरले बताए । 

‘अहिले यहाँ रहेका होटलहरु कुनै पनि खाली छैनन्’, होटल फ्लोराका सञ्चालक समेत रहेका कुँवरले उनले–‘यसले आर्थिक विकासमा ठूलो सहयोग पुगेको छ ।’