नेपाली जनसम्पर्क समिति डेनमार्कले फुटबल प्रतियोगिता आयोजना गर्ने
डेनमार्क,३० वैशाख । नेपाली जनसम्पर्क समिति, डेनमार्कले फुटबल प्रतियोगिता आयोजना गर्ने भएको छ । ३० र ३१ जुलाई, २०२२ मा समितिले जनसम्पर्क फुटबल प्रतियोगिता आयोजना गर्न लागेको हो ।
प्रतियोगिता डेनमार्कको राजधानी कोपेन्हेगनमा आयोजना हुने भएको छ । यो फुटबल प्रतियोगितामा नेपाली भाषी, फुटबल खेल्न मन पराउने सबैको सहभागिता हुने नेपाली जनसम्पर्क समिति, डेनमार्कका सभापति यादव बस्नेतले बताए । कोरोना कहरका कारणले २ वर्षदेखि सञ्चालन हुन नसकेको र डेनमार्क बसोबास गर्ने नेपाली भाषीहरू माझ लोकप्रिय भएकोले प्रतियोगितामा व्यापक सहभागिता हुने यादव बस्नेतले बताए ।
बितेको २ वर्ष बाहेक, सन २०१४ बाट हरेक वर्ष प्रतियोगिता सञ्चालन हुँदै आएको र यो फुटबल प्रतियोगिताले नेपाली भाषीमा आपसी भाइचारा बढाउने र व्यस्त समयबाट २ दिन छूट्याएर मनोरञ्जन गर्ने साथै आपसमा भलाकुसारी गर्ने अवसर प्रदान गर्ने बस्नेतले बताए ।
फुटबल प्रतियोगितालाई सभ्य र भब्यबनाउन तयारी तीव्र रूपमा अगाडि बढाइएको खेलकुद तथा अतिरिक्त विभागका संयोजक तथा संस्थाका वरिष्ट उपसभापति रमेश घिमिरेले बताए । नेपाली भाषीहरूले स्थापना गरी तयारी प्रतियोगिता सञ्चालन गर्दै आएका क्लबहरू सँग प्रतियोगिताका बारेमा अनौपचारिक छलफल भएको र छिट्टै औपचारिक छलफल चलाउने संयोजक घिमिरेले बताए ।
नेपाली जनसम्पर्क समिति, डेनमार्कको एक महत्त्वपूर्ण र नियमित कार्यक्रम यो फुटबल प्रतियोगिता भब्यरुपमा सफल पार्न सङ्गठन लागिपरेको सङ्गठनका महामन्त्री विजय सापकोटाले बताएका छन् । प्रतियोगिता मनोरञ्जनात्मक होस् भन्ने हेतुले बच्चाहरूको मैत्री पूर्ण खेलको पनि आयोजना गरिने भएको छ ।
त्यसै गरी शरीर फुर्ती राख्न ब्यायमका रुपमा फुटबल खेल्दै आएका भेट्रान समूह (करिब ३० वर्ष माथिका खेलाडीहरू सम्मिलित )पनि खेलकुदमा सहभागी हुने बताइएको छ ।बच्चाहरूको र भेट्रान समूहको सहभागिताका लागि नेपाली जनसम्पर्क समिति, डेनमार्कका वरिष्ठ उपसभापति द्वय दीपेन्द्र चुँडाल र प्रकाश ढकाल तयारीमा लागेको आयोजकले बताएको छ ।
तपाईको प्रतिक्रिया