ओडिशा रेल दुर्घटना : स्थानीय सञ्चारमाध्यमद्वारा तीन जना नेपालीको मृत्यु भएको समाचार सार्वजनिक

ओडिशामा गत शुक्रबार भएको रेल दुर्घटनामा तीन जना नेपाली नागरिकको निधन भएको खुलेको छ । दुर्घटनामा एक जना भने घाइते भएका छन् । ओडिशा टिभीको रिपोर्टअनुसार अहिलेसम्म चारजना नेपाली नागरिक रेल दुर्घटनामा परेको खुलेको हो । त्यसमध्ये ३ जनाको मृत्यु भएको र १ जना घाइते अवस्थामा उपचाररत छन् ।

कटकको एससीबी मेडिकल कलेजमा १५ वर्षीय बालकको उपचार चलिरहेको छ । उनको नाम रामानन्द पासवान बताइएको छ । उनको खोजीमा पर्सा जिल्लाबाट आएका उनका बुवा हरि पासवानसँग रामानन्दको भेट भइसकेको टीभीले आफ्नो रिपोर्टमा जनाएको छ । रामानन्द आफ्ना अन्य तीनजना आफन्तहरूसँग कामको खोजीका लागि ओडिशा आएका थिए । उनको साथमा रहेका तीन जनाको निधन भएको रिपोर्टमा उल्लेख छ ।

दुर्घटनामा नेपालीको मृत्यु भएकोबारे स्वतन्त्र पुष्टि भने भइसकेको छैन । उनीहरू कोरोमंडल एक्सप्रेसबाट यात्रा गर्दै थिए । मृत्यु भएकाहरूको पहिचान भने अहिलेसम्म सार्वजनिक भएको छैन ।

दिल्लीस्थित नेपाली दूतावासले मिडिया रिपोर्टबाट आएको जानकारीबारे विदेश मन्त्रालय तथा नेपाली समुदायसँग बुझ्ने प्रयास भइरकेको बताएको छ । ओडिशाको बालसोर जिल्लाको बाहानगा बजार रेल्वे स्टेसननजिक शुक्रबार बेलुका ७ बजे दुर्घटना भएको हो । दुर्घटनामा तीनवटा रेल परेको हो । पहिलो एउटा मालवाहक रेलमा पछाडिबाट यात्रुवाहक रेल ठोक्किन पुगेको हो ।

यात्रुवाहक रेल कोरोमण्डल एक्सप्रेसको १२ वटा डिब्बा रेल्वे लिकबाट बाहरिएर पल्टिएको थिए। त्यही बेला अर्को रेल्वे लाइनबाट बेंगलुरुबाट आइरहेको अर्को रेल पहिला नै उछिट्टिएको रेलका डब्बासँग ठोक्किन पुगेको थियो । तेस्रो रेल यशवंतपुर–हावडा एक्सप्रेस हो । दुर्घटनापछि उक्त रेलको १७ वटा डिब्बा लिकबाट तल आएको हो । तीनवटा रेल ठोक्किएर भएको दुर्घटनामा २ सय ८८ जनाको निधन भएको छ भने सयौं घाइते छन् ।