प्रदेश प्रमुखसमक्ष मुख्य न्यायाधिवक्ताको कार्यालयको प्रतिवेदन पेश
सुदूरपश्चिम प्रदेश मुख्य न्याधिवक्ताको कार्यालयले प्रदेश प्रमुख नजिर मियाँसमक्ष आफ्नो वार्षिक प्रतिवेदन पेश गरेको छ ।
मंगलबार मुख्य न्यायाधिवक्ता ठेकेन्द्रराज जोशीले आर्थिक वर्ष २०८०\०८१ को वार्षिक प्रतिवेदन प्रदेश प्रमुख मियाँसमक्ष पेश गरेका हुन् । उक्त प्रतिवेदनमा मुख्य न्यायाधिवक्ता कार्यालयले गरेका प्रगति, आइपरेका चुनौती र आवश्यक सुझाव समेटिएका छन् । अधिकांश मुद्धाहरु सर्वोच्च अदालत पर्ने भएको हुँदा काठमाडौँमा सम्पर्क कार्यालयको आवश्यकता महसुस भएको प्रतिवेदनमा उल्लेख गरिएको छ । मुख्य न्यायाधिवक्ता महान्यायाधिवक्ता मातहतमा रहने विषयलाई पनि स्पष्ट गरिनु पर्ने विषय प्रतिवेदनमा उल्लेख गरिएको छ ।
प्रतिवेदन पेश गर्ने कार्यक्रममा मुख्य न्यायाधिवक्ता सहित उप न्यायाधिवक्ता टेक बहादुर थापा, प्रशासन अधिकृत सत्यराज पडाल र लेखा अधिकृत महादेव पन्तको उपस्थिति रहेको थियो । प्रदेश प्रमुख कार्यालयबाट निमित्त सचिव शंसेर सिंह रावल, प्रदेश प्रमुखका प्रमुख स्वकीय सचिव साबिर अली लगायतको उपस्थित रहनु भएको थियो । उक्त कार्यक्रम प्रदेश प्रमुख कार्यालयका लेखा अधिकृत उसा भट्टले सहजीकरण गरेकी थिइन् । वार्षिक प्रतिवेदन बुझ्दै प्रदेश प्रमुख मियाँले संवैधानिक व्यवस्था अनुसार उक्त प्रतिवेदन मुख्यमन्त्री तथा मन्त्रीपरिषद् कार्यालयमा मार्फत प्रदेश सभामा छलफल गराउने र यथाशीघ्र छिटो कार्यान्वयनमा जोड दिने बताएका थिए ।
सोमबार अख्तियार दुरुपयोग अनुसन्धान आयोग र आइतबार प्रदेश लोक सेवा आयोगले पनि प्रदेश प्रमुखलाई वार्षिक प्रतिवेदन पेश गरेका थिए ।
तपाईको प्रतिक्रिया