नेपालको पर्यटन क्षेत्रमा विदेशी लगानीको आकर्षण

काठमाडौं– नेपालको पर्यटन क्षेत्रमा विदेशी लगानीको आकर्षण देखिएको छ । उद्योग विभागको तथ्यांकअनुसार चालु आर्थिक वर्षको ४ महिनामा नेपालमा आएको कुल लगानी प्रतिबद्धतामध्ये सबैभन्दा धेरै पर्यटन क्षेत्रमा देखिएको हो ।

विभागको प्रतिवेदनअनुसार चालु आर्थिक वर्षको ४ महिनामा नेपालमा १७ अर्ब ३ करोड ७७ लाख ५६ हजार ४ सय रुपैयाँ बराबरको लगानी प्रतिबद्धता आएको छ । जसमध्ये सबैभन्दा धेरै ७२ प्रतिशत लगानी पर्यटन उद्योगको क्षेत्रमा आएको छ ।
त्यस्तै, लगानी प्रतिबद्धताको आधारमा सेवा क्षेत्रमा १३ प्रतिशत र उत्पादन क्षेत्रमा ८ प्रतिशत रहेको देखिन्छ ।

विभागको तथ्यांकअनुसार समीक्षा अवधिमा नेपालका विभिन्न १५४ वटा कम्पनीले नेपालमा लगानी प्रतिबद्धता जनाएका छन् । जसमध्ये १५१ वटा कम्पनीले साना उद्योग, १ वटा कम्पनीले मझौला उद्योग र २ वटा कम्पनीको ठूला उद्योगमा लगानी प्रतिबद्धता रहेको छ ।
त्यस्तै, समीक्षा अवधिमा २५ वटा विभिन्न कम्पनीको १ अर्ब १३ करोड ६१ लाख १५ हजार ८५० रुपैयाँ बराबरको शेयर खरिद सम्झौता भएको छ भने १३ वटा कम्पनीले प्रविधि हस्तान्तरण सम्झौता गरेका छन् ।