फुटबलका प्रशिक्षक चौधरी एमाले प्रवेश

मोरङ – फुटबल प्रशिक्षक पारस चौधरी नेकपा एमालेमा प्रवेश गरेका छन्।

पूर्व फुटबल खेलाडीसमेत रहेका चौधरीसहित १४ जना नेकपा (एकीकृत समाजवादी) परित्याग गर्दै एमालेमा प्रवेश गरेका हुन्।

पार्टीले आफूहरुलाई कार्यक्रममा नबोलाउने, वास्ता नगर्ने भएपछि पार्टी छाड्नु परेको उनको भनाइ छ। उनले भने, ‘विगत तीन वर्षदेखि समाजवादीमा थिएँ। जहिले पनि अर्को राजनीतिक दलसँग जोडेर भन्ने। वास्ता नगर्ने, धेरैकुरा छ यसमा। त्यसैले पनि आज एमालेमा प्रवेश गरेको हो।’

समाजवादीमा प्रवेश गर्नुपूर्व चौधरी ग्रामथान गाउँपालिकाको झोराहटबाट नेपाली कांग्रेसको क्रियाशील सदस्य थिए।कांग्रेस छाडेर समाजवादी प्रवेश गरेका चौधरी एमालेमा प्रवेश गरेका हुन्।

चौधरीसँगै एमालेबाट समाजवादी कित्तामा पुगेका तत्कालीन पूर्वाञ्चल क्षेत्रीय खेलकुद विकास समितिका अध्यक्ष रविन नगरकोटी पनि एमालेमै फर्किएका छन्। एमालेको कोटामा उनी २०७२ सालमा खेलकुद विकास समिति अध्यक्ष भएका थिए।

त्यसअघि उनी एमालेबाटै २०६३ देखि ०६५ सालसम्म जिल्ला खेलकुद विकास समिति मोरङको अध्यक्षमा रहेका थिए। नगरकोटीले पार्टी विभाजनका क्रममा अन्यत्र लागिएको तर त्यहाँ गुटको राजनीति चरम रहेको हुँदा त्याग गरेको बताए।