फाइनलमा सुदूरपश्चिमको चौथो विकेट पतन, निशमको बलमा ब्राण्डन आउट

काठमाडौं । नेपाल प्रिमियर लिग (एनपीएल)को आज जारी फाइनलमा जनकपुर बोल्ट्सविरुद्ध सुदूरपश्चिम रोयल्सले चौथो विकेट गुमाएको छ ।

कीर्तिपुरस्थित त्रिभुवन विश्वविद्यालय क्रिकेट मैदानमा टस जितेर ब्याटिङमा उत्रिएको सुदूरपश्चिमले १५.६ ओभरमा ब्राण्डन म्याकमुलन आउट भएका हुन् । उनी १२ बलमा १४ रन बनाएर आउट भए । उनको विकेट जिमी निशमले लिएका हुन् । त्यसअघि हर्मित सिंह पनि १४ रनमै आउट भएका थिए ।

दोस्रो विकेटमा ओपनर विनोद भण्डारी ४१ रन बनाएर आउट भए । उनी ललित राजवंशीको बलमा आउट भएका हुन् । यसअघि ११.६ ओभरमा ११७ रन बनाउँदा पहिलो विकेट गुमाएको थियो । ६९ रन बनाएर ओपनर शेफ जैब आउट भएका हुन् । उनले ४३ बलमा ८ चौका र २ छक्का प्रहार गरे । किशोर महत्तोले उनको विकेट लिएका हुन् । पहिलो विकेटका लागि भएको यो साझेदारी अहिलेसम्मकै उच्च हो ।

सुदूरपश्चिम रोयल्सले क्वालिफायरमा जनकपुर बोल्ट्सलाई पराजित गर्दै फाइनलमा पुगेको हो भने जनकपुर बोल्ट्सले कर्णाली याक्सलाई पाखा लगाउँदै फाइनलमा स्थान पक्का गरेको हो ।

उपाधि विजेताले ट्रफीसहित रु एक करोड १० लाख र उपविजेताले रु ५१ लाख प्राप्त गर्नेछन् । साथै तेस्रो भएको कर्णाली याक्सले रु २५ लाख र चौथो भएको चितवन राइनोजले रु १५ लाख प्राप्त गर्नेछन् ।

जारी प्रतियोगितामा दुवै टोली दुई पटक एकापसमा भिडिसकेका छन् । जसमा दुवै पटक जनकपुर बोल्ट्समाथि सुदूरपश्चिम रोयल्स हावी भएको थियो । लिग चरणको खेलमा सुदूरपश्चिमले जनकपुरलाई ७२ रनले पराजित गरेको थियो भने पहिलो क्वालिफायरमा जनकपुर आठ विकेटले पराजित भएको थियो ।