इमर्जिङ क्रिकेटर विपिनलाई स्वस्तिमाको आइफोन उपहार

काठमाडौं । नेपाल क्रिकेट लिग (एनपीएल)मा इमर्जिङ प्लेयर अवार्ड जितेका कर्णाली याक्सका क्रिकेटर विपिन शर्मालाई अभिनेत्री स्वस्तिमा खड्काले आइफोन उपहार दिएकी छन् ।

स्वस्तिमा कर्णाली याक्सकी प्रवर्धन दूत समेत हुन् । आफ्नो टीमका हरेक खेलको क्रममा टीयू क्रिकेट ग्राउन्डमा उपस्थित भएर खड्काले टीमलाई हौसला प्रदान गर्दै आएकी थिइन् ।

क्रिकेटर शर्माले सामाजिक संजालबाट क्रिसमस गिफ्टको रुपमा आफूलाई स्वस्तिमाले फोन गिफ्ट दिएको जनाएका छन् । उनले आफूले पाएको गिफ्ट र स्वस्तिमाले दिएको लिखित नोट पनि शेयर गरेका छन् ।

नोटमा स्वस्तिमा लेख्छिन्, ‘एनपीएलमा तिम्रो यो अविश्वसनीय सफलताप्रति बधाई छ । यो फोन तिम्रो कडा परिश्रम र समर्पणको लागि प्रशंसाको सानो प्रतीक हो । यसले तिम्रो जीवन र मैदानमा दुबैतिर अनगिन्ती राम्रो कलहरू ल्याउन सकोस् । तिमीले उत्कृष्ट अवसरहरू पाउन सकोस् भन्ने शुभकामना ।’

शर्माले एनपीएलमा कर्णालीका लागि १३ विकेट लिएका थिए ।