बझाङमा छुट्टाछुट्टै जीप दुर्घटना चालकसहित पाँच जनाको मृत्यु

बझाङ, १९ पुस । बझाङमा बिहीवार भएका दुई वटा छुट्टाछुट्टै जीप दुर्घटनामा पाँच जनाको मृत्यु भएको छ ।

बिहीवार राति साढे आठ बजे तिर तलकोट गाउँपालिकाबाट चैनपुर तिर आइरहेको से १ ज ८४३ नम्बरको जीप तलकोट गाउँपालिका–२ सुकगाडमा दुर्घटना हुँदा चार जनाको मृत्यु भएको हो ।

जिल्ला प्रहरी कार्यालयका प्रहरी निरीक्षक लोकेन्द्र सिं ठगुन्नाले मृत्यु हुनेमा जीप चालक केदारस्युँ गाउँपालिका –१ रायलका ३३ वर्षीय शम्शेर मल्ल, तलकोट गाउँपालिका –४ का ३६ वर्षीय बम बहादुर धामी, ७२ वर्षीया जोगेनी देवी धामी र मृतक बम बहादुर धामीको छोरी पाँच वर्षीया आकृती धामी रहेको बताए ।

दुर्घटना भएको जीप सडकबाट करिब दुई सय मिटर तल खसेको थियो । चालक सहित तीन जनाको घटना स्थलमै र पाँच वर्षीया बालिकाको उपचारका लागि सदरमुकाम ल्याउँदै गर्दा बाटोमा मृत्यु भएको हो ।

त्यस्तै बिहीवार राति भएको अर्को जीप दुर्घटनामा चालकको मृत्यु भएको छ । राति करिब नौ बजे मष्टा गाउँपालिकाको भातेखोलाबाट रनाडा तर्फ जादै गरेको सु.प्र.प्र.०१००१ ज १३९८ नं.को जीप कोटदेवलमा दुर्घटना हुँदा ४२ वर्षीय जीप चालक धर्म थापाको घटनास्थल मै मृत्यु भएको प्रहरीले जनाएको छ ।

प्रहरीका अनुसार चालक मात्रै सवार रहेको उक्त जीप सडकबाट एक सय मिटर तल खसेको थियो ।