माघ ४ गतेदेखि ‘भ्वाइस अफ नेपाल सीजन–६’

काठमाडौं– लोकप्रिय सांगीतिक रियालिटी शो ‘भ्वाइस अफ नेपाल सीजन–६’ को प्रसारण मिति तय भएको छ । गायनमा आधारित यो लोकप्रिय रियालिटी शो आगामी माघ ४ गते शुक्रवारदेखि प्रसारण हुने भएको छ ।

हिमालय टेलिभिजनबाट प्रत्येक शुक्रवार तथा शनिवार राति ८ बजे तथा भ्वाइस अफ नेपालको युट्युब च्यानलबाट साढे ८ बजेदेखि यो कार्यक्रमको प्रसारण प्रारम्भ हुने निर्देशक लक्ष्मण पौड्यालले जानकारी दिएका छन् ।

निर्देशक पौड्यालका अनुसार यसपटक पनि विगतका सीजनहरुजस्तै विभिन्न राउण्ड कायमै रहेका छन् । साथै यसपटक केहि कोच परिवर्तन भएका छन् । यसपटक लोकदोहोरी गायक खेम सेन्चुरी तथा गायिका मेलिना राई नयाँ कोचको रुपमा भित्रिएका छन् भने यसअघि कोच बनिसकेका राजु लामा र उदय सोताङ पनि छन् । शोको ब्लाइण्ड अडिसनमा ६१ जनाले प्रतिस्पर्धा गर्नेछन् ।