प्रिय गोपी दाई

मैले पछिल्ला लेखहरुमार्फत उठान गरेका विषयहरु मध्ये व्यक्तिका नाममा दर्ता रही सार्वजनिक सडकमा लगतकट्टा हुन बाँकी रहेका सडकहरुको लगत कट्टाको प्रकृया शुरु गर्नुभएकोमा धन्यवाद । 

लामो समयदेखि आफूसंगै नरहेको जग्गाको कर तिर्न बाध्य नागरिकलाई तपाईको यो निर्णयले राहत दिनेछ । अन्य सुझावहरुलाई पनि यसैगरी कार्यान्वयन गरिदिनुहुनेछ भन्ने अपेक्षा छ । 

तपाई निर्वाचित भएपछि तपाईले गरेका हरेक राम्रा कामहरुका लेख्न कहिल्यै कञ्जुस्याई गरेनौ । नगरपालिकाका हरेक सकारात्मक र रचनात्मक कार्यलाई हामीले जहिल्यै महत्वका साथ प्रकाशित गर्दै आएका छौ । जनतालाई असुविधा भएका विषयमा तपाईलाई जानकारी दिनु पत्रकारिताको धर्म ठानेर कर लगायतका विषयमा पनि समाचार मार्फत जनताका गुनासा सार्वजनिक नगरेका होईनौ । 

गत वर्ष तपाईले गरेका राम्रा कामको फेहरिस्त एउटा लेख मार्फत उजागर गरेको थिए । यस पटक दुई वटा लेख मार्फत जनगुनासाहरु सार्वजनिक गरे । तपाईले सुने जस्तो क्रमशः लेख्ने सोच वा उद्देश्य भने थिएन । तपाईको स्वास्थ्यको संवेदनशीलता प्रति म कसरी गैर जिम्मेवार हुनसक्छु ? तपाई एउटा व्यक्ति होईन्, यतिबेला संस्था हो । 

लेखहरु प्रकाशित भएपछि थुप्रै मिश्रित प्रतिक्रिया आए । पक्ष अनि विपक्षमा । दुईटै थरीका प्रतिक्रियाको म सम्मान गर्छु । तर अशिष्ट, अमर्यादित र अशोभनीय प्रतिक्रिया कसैका लागि प्रियकर होईनन् । धनगढीको बिबिधता नै यहाँको सुन्दरता हो । यही बिबिधतामा हुर्किएको धनगढीमा जस्तो हार्दिकता अन्यत्र विरलै पाईन्छ । धनगढी एउटा शहर मात्र होईन । यो एउटा बिचार हो । जसको देशमै पृथक पहिचान छ । 

धनगढीको मात्र नभएर सुदूर पश्चिमको विकासका सवालमा तपाई हामी सधै एक मञ्चमा संगै उभियौ । यो शहर तपाईलाई झै मलाई पनि उत्तिकै प्यारो छ । संसारको जुनसुकै कुनामा पुगेपनि त्यहाँ आफूलाई धनगढीयन भनेर चिनाउन पाउदा गर्व गर्छु । वाद, विचार, आस्था, वर्ण र वर्ग हाम्रा बीचमा कहिल्यै आएन् । एउटै ठाउँमा रहदा, बस्दा, कहीकतै मतभिन्नता भयो होला । कही फरक मत राखे हूला । कही सुझाव दिए । त्यसमा कुनै रीसराग वा प्रतिशोध थिएन । हुदैन पनि । एउटा नागरिक र धनगढीयन भएका नाताले दिएका सुझाव हुन् । 

तपाईजस्तै मेरो पनि परिकल्पना हो– समृद्ध धनगढी, सुन्दर धनगढी । धनगढी विमानस्थल कालोपत्रे, त्यसको सञ्चालन, सुन्दर सुदूर पश्चिम अभियानमा तपाईसंगै होमिने एक जना म पनि हूँ । र, सुदूर पश्चिम दवाव समूह लगायत अरु पनि थुप्रै मुद्दामा हामीसंगसंगै रह्यो । 

पछिल्लो केही समयता गुम्सिएका गुनासाहरु सुन्दा लाग्यो, जनताका सबै गुनासा तपाईसम्म पुगेनन् कि ? तपाई उपमहानगरपालिकाको सर्वागिंण हीतका लागि सोचिरहदा, कही निमूखा बर्गहरु अन्यायमा परेको तपाईले भेउ पाउनु भएन कि ? तपाईका नजिककै कतिपय मान्छेले तपाईलाई घेराबाट बाहिर आउन दिएनन कि ? कतिपय कुरामा तपाईलाई गुमराहमा राखियो कि ? त्यहीकारण सबैसम्म पुग्न पाउनु भएन, सबैका कुरा सुन्न पाउनु भएन कि ? तपाईको प्रतिशोधको शिकार हुने डरले कही मान्छे बोल्न डराईरहेका छन् कि ? तपाईले चाहेको व्यवस्था त्यस्तो पक्कै होईन् । जहाँ तपाईसंग मान्छेहरु डराउन । तिनले आफ्ना कुरा सुनाउनै पाएनन्, जो तपाईलाई सुनाउन चाहन्थे । तिनका कुरा मात्र सुन्नुभयो, जो तपाईलाई मन पर्ने कुरा मात्र सुनाउथे । 

कुरा सबैका सुन्नुस । तर अरुले भनेका कुरा सुनेर कसैप्रति दृष्टिकोण बनाउनुअघि एक पटक त्यही व्यक्तिसंग सोध्नुहोस, वास्तविता के हो ? उसले भनेको हो कि होईन ? 

जस्तो, तपाईले ४० वटा लेख आउदैछ रे भन्नुभयो, मैले नबोलेको कुरा तपाईलाई कस्ले पु¥यायो ? किन  र कुन नियतले पु¥यायो ? त्यो मान्छे तपाईको प्रिय हुनका लागि कही तपाईलाई तनाव दिने कुरा त गरिरहेको छैन् ? 

तपाईसंग मेरो कुनै बैरभाव छैन् । र, हुनुपर्ने कारण पनि छैन् । तपाई जहाँ हुनुहुन्छ, त्यहाँबाट धनगढीका लागि काम गरिरहनु भएको छ । म जुन, ठाउँ र विधामा छु, त्यहीबाट धनगढीलाई चिनाउने र यहाँका सकारात्मक कुराहरुलाई उजागर गर्दै आएको छु ।

तपाईले संक्षिप्त भिडियोमा चुनावताकाको एउटा भिडियोको प्रसंगमा घुमाउरो पाराले मेरो संलग्नता रहेको भन्नुभयो । तपाईलाई राम्रैसंग थाह छ, त्यो कुन पत्रकारले खिच्यो, तपाईको टीमसंग उसको के कस्तो कुरा भयो, जो मेरो सरोकारको विषय होईन । र, तपाई वा अरु कसैका निजी जीवनका विषयमा मैले कहिल्यै त्यस्तो रिपोर्टिङ गरेको छैन् । गर्नुपनि छैन् । आवेशमा आएर तपाई जत्तिको जिम्मेवार व्यक्तिले यस्तो अप्रमाणित कुरा गरेको सुहाउदैन् । 

कसैको निजी मामिला मेरो चासोको विषय कहिल्यै रहेन् । सार्वजनिक सरोकारका विषयमा लेख्न मलाई मलाई अन्य मिडियाको सहारा कहिल्यै चाहिएन ।

तपाई धनगढी उपमहानगरपालिकाको प्रमुख हो । त्यसैले धनगढीमा भएका राम्रा काम र निर्णयको जस तपाईले पाउनुहन्छ । अपसजको भागीदार पनि तपाई नै । पदमा बसेको व्यक्तिसंग आम नागरिकको अपेक्षा पनि हुन्छन् । र, आलोचना पनि कहिलेकाही आउनसक्छन् । यो स्वाभाविक प्रकृया हो ।

कुनै सन्दर्भ र घट्नाका सम्बन्धमा लेख तथा समाचार लेख्नु पत्रकारको धर्म हो । मैले त्यही धर्म निर्वाह गरेको हूँ । मेरो लेखको आशय पनि त्यही हो ।

लेखमा उल्लेख गरिएका विषयवस्तु, सुझाव प्रति तपाई वा तपाईका समर्थकहरुको बिमती हुन सक्छ । त्यसमा आउने शिष्ट र मर्यादित सुझाव र प्रतिक्रियालाई स्वाभाविक रुपमा लिन्छु । तर त्यसैलाई आधार बनाएर हुर्मत लिने, अशिष्ट भाषा र शैलीमा प्रस्तुत हुने समर्थकहरुलाई तपाईले रोक्नु भएन भने त्यसले समाजलाई कता डो¥याउला ? तपाई हामीले परिकल्पना गरेको समाज के त्यस्तै हो त ? जहाँ फरक मत राख्नै नपाईने ? 

सडक विस्तारका क्रममा उठिवास भएका, जसको जीवनयापनका सबैबाटाहरु बन्द भएका छन्, उनीहरुका लागि बाँच्ने वातावरण बनाईदिनुहोस । मेयरका हैसियतले तपाई नै उनीहरुको संरक्षक हो ।

धनगढीको मूल सडकका व्यवसायीहरु धराशायी भएका छन् । कैलाली उद्योग वाणिज्य संघको पूर्व अध्यक्ष समेत रहीसकेको नाताले, व्यवसायीका कुरा सुन्नु तपाईको दायित्व हो, जसको हकहीत र रक्षाका लागि तपाईले आफ्नो कार्यकालमा काम पनि गर्नुभयो । त्यो विगत त विर्सिनुभएन भन्ने व्यवसायीहरुको गुनासो छ । अझै ढिलो भएको छैन्, उनीहरुसंग संवाद गरिदिनुहोस । उनीहरुका कुरा सुनिदिनुहोस । 

यो पनि सत्य हो, व्यवसायीका सबै समस्या तपाईले समाधान गर्नसक्नुहुन्न, कतिपय समस्या पहिलेदेखि नै थिए, बजार विस्तारका क्रममा केही समस्या थपिए, तर उनीहरुको पीडामा तपाई मल्हम लगाउन सक्नुहुन्छ । तपाईसंग व्यवसायीको यस्तो अपेक्षा छ ।

नागरिकको गुनासो छ, पालिकाले करमाथि कर लगायो । जस्तो धनगढी उपमहानगरपालिकामा कर तिर्न जादा त्यहाँ सवारी साधन पार्किङ गर्दा कर असुल्ने गरिएको छ । र, ईलेक्ट्रिक गाडी चार्ज गर्दा चार्जिङ शुल्कसंगै पार्किङ शुल्क पनि लिने गरिएको छ । यस्ता दोहोरो शुल्क बन्द गरियोस । 

शिक्षकहरुको सरुवामा गुनासो छ । कसैले राम्रो ठाउँ पाए । योग्यता नपुगेकाहरुले पनि जिम्मेवारी पाए । त्यही विद्यालयमा योग्यता भएकाहरु भूमिका विहीन भए । अन्याय भयो भने वाफत चार महिनाको तलव नपाएको एक जना शिक्षक गुनासो गर्दै थिए । विरामी र अशक्त शिक्षकलाई धनगढीबाट जुगेडा सरुवा गरिएको गुनासो छ । कतिपय विरोध गर्ने शिक्षक पुरस्कृत भए । भनसुन र पहूँच भएकाहरु दुर्गमबाट सुगम तानिए । चुपचाप काम गर्ने अन्यायमा परिरहे । शिक्षकका यस्ता गुनासाहरुलाई सुनिदिनुहोला ।  

तपाईले गरेका थुप्रै राम्रा कार्यहरु यस्ता साना साना कुराहरुले ओझेलमा परिरहेका छन् । परालमा लगाईएको कर हटाईयोस । कतिपय कर अस्वभाविक छन्, अचाक्ली छन्, त्यसमा सुधार गरियोस । परिमार्जन गरियोस । कतिपय वस्तुमा अन्तर वडाभित्रै कर लिने गरिएको नगरवासीको गुनासो छ 

तपाई सबैको मेयर हो । सबैलाई समान व्यवहार गरिदिनुहोस । तपाईका लागि कोही टाढा कोही नजिक हुनुहुदैन् । सवैलाई न्याय होस । तपाईको व्यवहार र नीतिका कारण कोही अन्यायमा नपरुन् । 

तपाई मेयर भईसक्नु हो । एउटा ईतिहास रचिसक्नुभयो, तपाई मेयर पदमा हुदासम्मका लागि लोकप्रिय हुनेभन्दा नगरका बासिन्दाका मनमा सधैभरी दिगो छाप छोड्नुपर्छ भन्ने हो । त्यसका धनगढीको विकास र समृद्धिमा सबैलाई जोड्नुहोस । सबैलाई साथमा लैजानुहोस । कतिपय सवालमा तपाईसंग मतभिन्नता हुन सक्छ । जव धनगढीको विकासको कुरा आउछ, त्यतिबेला मतभिन्तताभन्दा माथि उठेर संगै हिडेका छौ । फेरि पनि हिड्नेछौ । 

तपाईलाई लिएर कर्मचारीमा डर छ । आम मान्छेमा डर छ । त्यो डर तपाई पदमा रहेसम्म मात्र हो । म चाहन्छु, तपाईलाई लिएर कर्मचारी र आमनागरिकमा श्रद्धा होस, सम्मान होस । जुन श्रद्धा र सम्मान तपाई पदबाट हटेपनि रही रहीरहोस । 

धनगढी उपमहानगरपालिकामा यस्तो थीति बसालिदिनुहोस, ताकि तपाई पदमा नरहेपनि त्यो थीति कायम रहोस । सिष्टमलाई बलियो र संस्थागत गरिदिनुहोस ।

जहाँ मान्छे विचार शुन्य हुन्छ । जहाँ मान्छेले आफूलाई दुख्दा ऐया भन्न पाउदैन् । जहाँ फरक मतको रक्षा र सम्मान हुदैन् । त्यो शहर मृत हुन्छ । तपाईले परिकल्पना गरेको धनगढी पक्कै पनि त्यस्तो होईन् । 

लेखपछि आएका सैयौ सकारात्मक प्रतिक्रियाले म उत्साही भएको छैन् । यो लेख कुनै व्यक्तिप्रति लक्षित थिएन् । धनगढी उपमहानगरपालिकाका मेयरसंग जोडिएका विषयमा राखिएका केही जिज्ञासा, केही गुनासा र केही आग्रह थिए । 

जहाँ जन्मिए । जहाँ हुर्किए । आगो पैचो लिएर हुर्किएको यो समाजमा डरलाग्ने गरी कसरी हुर्कियो, अशिष्टता ? जहाँ मान्छे भावना विहीन भए । संवेदनाविहीन भए । 

उनीहरुप्रति पनि कुनै गुनासो छैन्,जसले सबै चिज विर्सेर तल्लोस्तरमा अशिष्ट टिप्पणी गरे । मैले आफैले २०२२ मा पोष्ट गरेको ईन्टरनेशनल भिजिटर लिडरसीप प्रोग्राम (आईभिएलपी)को फोटो तानेर हतारमा शेयर गरे । त्यही फोटोको मुन्तिर लेखिएको क्याप्सन नबुझ्ने त सायद कोही थिएनन् । संसारका प्रतिष्ठित कार्यक्रममा सहभागी हुनु कसैको एजेण्ट हुनु होईन्,कसले बुझाओस । 

कुनै पार्टी वा नेताले मलाई अवसर दिएको छैन् । त्यस्तो अवसर लिनु पनि छैन् । मैले जे पाए, यही धनगढीबाट पाएको हूँ । यही समाजमा बस्नुछ । जिना यहा मरना यहाँ । संसारको जुनसुकै देशमा गएपनि धनगढीयनका रुपमा सगर्व चिनाउछु ।

धनगढीको नागरिकका तर्फबाट मेयर साप तपाईसंग मेरा केही आग्रह छन् ।

अनावश्यक कर हटाईदिनुहोस । कतिपय करको दर परिमार्जन गर्दा नागरिकलाई सहज हुनेछ ।

तपाई सबैको साझा व्यक्ति हो । हरेक नागरिकलाई समान व्यवहार गरिदिनुहोस। सबैका लागि न्याय बराबरी होस । तपाईको नीति र व्यवहारबाट कोही अन्यायमा नपरुन । कोही प्रताडित    नहुन् ।

सडक विस्तारका क्रममा उठिवास भएका निमूखा बर्गको जीवनयापन सहज बनाउन पहल गरिदिनुहोस । 

तपाईको प्रिय भईरहन ‘सबै ठिक छ’ भनिरहन सकिन्, जे देखे, त्यही भने । अव यति लेखे वाफत यो शहरमा बाँच्न पनि नपाईने भए । शहर तपाईको । मर्जी तपाईको ।

मेयर साप, तपाई पहिले झै स्वस्थ हुनुुस । अझै धेरै बाँच्नुस । र, धनगढीका नागरिकलाई पनि बाँच्ने वातावरण बनाईदिनुहोस । यही कामना र आग्रह छ ।