राष्ट्रियसभाबाट पारित भए पाँच अध्यादेश

काठमाडौं : सरकारले जारी गरेका छमध्ये पाँच वटा अध्यादेश राष्ट्रियसभाबाट पनि स्वीकृत भएका छन्। बिहीबार राष्ट्रियसभाको बैठकमा निर्णयार्थ पेश गरिएका ती अध्यादेशहरू बहुमतले पारित भएका हुन्।

स्वीकृत भएका अध्यादेशहरूमा सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐन संशोधन गर्ने अध्यादेश, आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, निजीकरण (पहिलो संशोधन) अध्यादेश, आर्थिक तथा व्यावसायिक वातावरण सुधार तथा लगानी अभिवृद्धि सम्बन्धी केही नेपाल ऐन संशोधन गर्ने अध्यादेश, र सहकारी सम्बन्धी केही नेपाल ऐन संशोधन गर्ने अध्यादेश, २०८१ रहेका छन्।

यसअघि, ती अध्यादेशविरुद्ध परेका विरोधका सूचनाहरू अस्वीकृत भएका थिए। यी अध्यादेश प्रतिनिधिसभाबाट बहुमतले पारित भइसकेका छन्। संघीय संसदका दुवै सदनबाट पारित भएसँगै अब प्रतिस्थापन विधेयक ल्याउने बाटो खुलेको छ।