गृह मन्त्रालय र सुरक्षा निकाय बीच आकस्मिक बैठक सुरु

काठमाडौं । गृह मन्त्रालयमा आकस्मिक बैठक सुरु भएको छ । गृहमन्त्री रमेश लेखक, गृह सचिव, सुरक्षा निकायका टोलीसहित बैठक सुरु भएको छ ।

राजावादी समूहको प्रदर्शन उग्र बन्दै गएपछि गृह मन्त्रालयमा आकस्मिक बैठक बसेको हो ।

प्रदर्शनको समीक्षा गर्दै अराजक गतिविधि कसरी रोक्ने भन्ने विषयमा छलफल भइरहेको गृहमन्त्री लेखकको सचिवालयले जनाएको छ ।

राजावादीहरूको प्रदर्शन उग्र बन्दा उनीहरूले विभिन्न पार्टी कार्यालयका मुख्यालय तारो बनाइरहेका छन् । एकीकृत समाजवादीको केन्द्रीय कार्यालय आलोक नगरमा उनीहरूले आगजनी गरिसकेका छन् ।

एमाले र माओवादी केन्द्रको पार्टी कार्यालय नजिक प्रदर्शनकारीहरू पुगेपछि प्रहरीले सुरक्षा व्यवस्था कडा बनाइरहेको छ ।

काठमाडौंको तीनकुने क्षेत्रमा स्थानीय प्रशासनले कर्फ्युनै लगाइसकेको छ ।