धनीलाई कर छुट दिने योजनाको तयारीमा ट्रम्प

काठमाडौँ -विश्वभरबाट आमेरिका भित्रिने वस्तुहरुमा कर लगाउने निर्णयपछि, राष्ट्रपति डोनाल्ड ट्रम्प अब अमेरिकाका धनीहरूलाई कर छुट दिने आफ्नो महत्वाकांक्षी योजनाको तयारी गरेका छन् ।

यो ट्रम्प र उनको रिपब्लिकन पार्टीको महत्वाकांक्षी योजना हो र ट्रम्पले चुनावी अभियानको क्रममा यसको घोषणा गरेका थिए । अमेरिकी बजेट आगामी केही महिनामा प्रस्तुत हुँदैछ र बजेट योजनामाथि शुक्रबार राति सिनेटमा छलफल भएको थियो । ट्रम्पले अमेरिकाका धनी मानिसहरूलाई ट्रिलियन डलरको कर राहत दिने, सीमा सुरक्षा बलियो बनाउने र रक्षा खर्च पनि बढाउने योजना बनाएका छन् । साथै, संघीय सरकारको खर्चमा पनि कटौती गरिएको छ ।

सरकारी दक्षता विभागको प्रमुखको रूपमा, एलन मस्कले संघीय सरकारको खर्चमा ट्रिलियन डलर कटौती गर्ने आफ्नो लक्ष्य हासिल गरेका छन् । अब ट्रम्प प्रशासन आफ्नो अर्को योजनामा ​​अगाडि बढिरहेको छ । रिपब्लिकन पार्टीले डेमोक्र्याटिक पार्टीबाट पनि विरोधको सामना गरिरहेको छ । डेमोक्र्याटिक पार्टीले संघीय योजनाहरूमा कटौती गरेर धनीहरूलाई कर छुट दिनु हुँदैन भन्छ । डेमोक्र्याटिक पार्टीले अधिकांश अमेरिकी नागरिकहरू सरकारी कल्याणकारी योजनाहरूमा निर्भर रहेको भन्दै धनीलाई कर छुट दिन नहुने बताउदै आएको छ ।

यो उथलपुथल त्यस्तो समयमा भइरहेको छ, जब डोनाल्ड ट्रम्पले विश्वका धेरै देशहरूमा पारस्परिक शुल्क लगाउने घोषणा गरेका छन् । यसको जवाफमा चीनले पनि अमेरिकामाथि प्रतिशोधात्मक कर लगाउने घोषणा गरेको छ र धेरै अन्य देशहरूले पनि त्यसै गर्ने विचार गरिरहेका छन् । ट्रम्पको यो कदमले अमेरिका लगायत विश्व अर्थतन्त्रलाई मन्दीमा धकेल्न सक्ने आशंका अर्थविद्हरूले व्यक्त गरिरहेका छन् र अमेरिकासहित विश्वका धेरै शेयर बजारमा शेयरको मुल्य घटिरहेको छ ।