सुदूरपश्चिम प्रदेश सरकारबाट बाहिरियो नाउपा

धनगढी । नागरिक उन्मुक्ति पार्टी (नाउपा) ले सुदूरपश्चिम प्रदेश सरकारलाई दिएको समर्थन फिर्ता लिएको छ । शुक्रबार बसेको संसदीय दलको बैठकले समर्थन फिर्ता लिने निर्णय गरेको प्रदेश संसदीय दलका नेता घनश्याम चौधरीले बताए । 

उनका अनुसार समर्थन फिर्तासम्बन्धी पत्र मुख्यमन्त्री कमलबहादुर शाहलाई बुझाइनेछ।

मुख्यमन्त्री शाहले बिहीबार नाउपाका मन्त्री रामेश्वर चौधरीलाई उद्योग, पर्यटन, वन तथा वातावरण मन्त्रालयबाट बर्खास्त गरेपछि नाउपाले समर्थन फिर्ता लिने निर्णय गरेको हो ।

सुदूरपश्चिम प्रदेशसभामा कुल ५३ सांसद छन्। जसमध्ये नाउपाका ७ जना सांसद छन्। वर्तमान कांग्रेस नेतृत्वको सरकारलाई एमाले र नाउपाले समर्थन दिँदै आएका थिए।

सरकार टिकाउन २७ सांसदको बहुमत आवश्यक पर्दछ। कांग्रेसका १८ र एमालेका ११ जना सांसद (सभामुखबाहेक) सरकार पक्षमा रहेकाले नाउपाको समर्थन फिर्ताले सरकारको बहुमतमा तत्काल प्रभाव नपर्ने देखिन्छ ।

प्रदेशसभामा माओवादी केन्द्रका १०, एकीकृत समाजवादीका ३, राप्रपा र एक जना स्वतन्त्र सांसद छन्। एसका सांसद दीर्घ सोडारी निलम्बनमा छन्।