पर्यटन विभागका निर्देशक यादवविरुद्ध भ्रष्टाचार मुद्दा

काठमाडौँ – अख्तियार दुरुपयोग अनुसन्धान आयोगले पर्यटन विभागका निर्देशक सचिन्द्र कुमार यादवविरुद्ध अकुत सम्पत्ती आर्जन गरेका भन्दै भ्रष्टाटार मुद्दा दायर गरेको छ। आयोगले बिहीबार यादवमाथि ९६ लाख ८५ हजार ५ सय ५३ रुपैयाँ बिगो दाबी गर्दै गैरकानुनी रुपमा सम्पत्ति आर्जन गरेको अभियोग दर्ता गरेको हो।

आयोगका प्रवक्ता राजेन्द्रकुमार पौडेलका अनुसार यादवको शुरू नियुक्ति मिति २०६६ साल जेठ २४ गतेदेखि २०७९ साल साउन २९ गतेसम्मको जाँच अवधिमा वैध आय २ करोड ६८ लाख १८ हजार ९ सय रुपैयाँ रहेको छ।

त्यही अवधिमा उनको कुल खर्च तथा लगानी भने ३ करोड ६५ लाख ४ हजार ४ सय ५३ रुपैयाँ छ। निर्देशक यादवको वैध आयभन्दा ९६ लाख ८५ हजार ५ सय ५३ रुपैयाँले स्रोत पुष्टि नभएको प्रवक्ता पौडेलले जानकारी दिलए।

सार्वजनिक पदमा बहाल रहँदा आफ्नो पदीय हैसियतको दुरुपयोग गरी गैरकानुनी सम्पत्ति आर्जन गरेको र अमिल्दो तथा अस्वाभाविक उच्च जीवनस्तर यापन गरेको अभियोगपत्रमा उल्लेख छ।

गैरकानुनी रुपमा आर्जन गरेको सम्पत्ति पत्नी आशा कुमारी यादवको नाममा राखेको पाइएकाले उक्त सम्पत्ति जफत गर्ने प्रयोजनार्थ उनलाई समेत प्रतिवादी कायम गरिएको छ।