कांग्रेसले पन्तलाई जिल्ला समन्वय समिति कैलाली प्रमुखको उम्मेदवार बनाउने

काठमाडौँ ।  यही मंसिर १६ गते हुने उपनिर्वाचनका लागि कैलाली जिल्ला समन्वय समिति प्रमुख पदमा नेपाली कांग्रेसले केशवराज पन्तलाई उम्मेदवार बनाउने भएको छ । 

कांग्रेस सुदूरपश्चिम प्रदेश संसदीय समितिको मंगलबार बसेको बैठकले धनगढी उपमहानगरपालिका वडा न.२ का वडा सदस्य  पन्तलाई जिल्ला समन्वय समिति कैलालीको प्रमुखको उम्मेदवार बनाउने निर्णय गरेको कांग्रेस सुदूरपश्चिम प्रदेश प्रवक्ता सुरत बहादुर रावत ‘डोटेली कान्छा’ले बताए । 

निर्णय पश्चात् उम्मेदवार पन्तलाई कांग्रेस सुदूरपश्चिम प्रदेशका पदाधिकारीहरूले शुभकामना दिएका छन् ।  

जिल्ला समन्वय समिति प्रमुख पदम बहादुर कलेलको निधन पश्चात् रिक्त रहेको कैलाली जिल्ला समन्वय समिति प्रमुखको पदमा आगामी मंसिर १६ गते उपनिर्वाचन हुँदैछ ।