९० को दशकका अभिनेत्री र जेन-जी संस्कृतिबारे मनिषाले पुस्तक लेख्‍ने

काठमाडौं । अभिनेत्री मनिषा कोइरालाले सन् १९९० देखि २००० सम्मका अभिनेत्री र जेन–जी संस्कृतिबारे कमेडी पुस्तक लेख्ने भएकी छन् । भारतको गोवामा आयोजना भइरहेको इन्टरनेसनल फिल्म फेस्टिभल अफ इन्डियामा उनले यो योजना सुनाएकी हुन् ।

खामोसी, बम्बे, १९४२ : अ लभ स्टोरी जस्ता फिल्मबाट परिचित अभिनेत्री तथा ‘उडान’ र ‘ट्राप्ड’जस्ता फिल्मका लागि चर्चित फिल्ममेकर विक्रमादित्य मोटवानेले सो अवसरमा ‘थिएटर र स्ट्रिमिङ प्लाटफर्मबीचको परिदृश्य’ नामक सत्रमा छलफल समेत गरेका थिए ।

‘अभिनेत्रीको रुपमा सानो होस् वा ठूलो पर्दा, जतिमा काम गरिन्छ, सबैमा इमान्दारिता आवश्यक पर्छ । तयारी, सोचाइ सबै उस्तै छ’ हालसालै सञ्जयलीला भन्सालीको हिट नेटफ्लिक्स श्रृंखला ‘हीरामण्डी : द डायमण्ड बजार’मा शीर्ष भूमिकामा अभिनय गरेकी मनिषाले भनिन् ।

मनिषाले पछिल्लो समय लगातार आफ्ना अन्तर्वार्तामा बलिउडमा आफ्नो संघर्षकालीन समयमा हुने कास्टिङ, अभिनेत्रीलाई लिएर हुने व्यवहारबारे धारणा राख्दै आएकी छन् । उनले लेख्ने भनिएको यो पुस्तकमा यिनै कुरा समेटिने अपेक्षा गरिएको छ ।

प्राइम भिडियोको ‘जुबली’ र नेटफ्लिक्सको ‘सेक्रेड गेम्स’ निर्देशन गरेका मोटवानेले स्ट्रिमिङले थप रचनात्मक स्वतन्त्रता प्रदान गरिरहेको बताए । ‘स्ट्रिमिङको अचम्मको पक्ष यो हो कि तपाईं थिएटरसँग जस्तो ठीक यति समयको फिल्म बनाउनुपर्छ भन्ने मापदण्ड हुँदैन । तपाईंसँग एउटा कथा छ भने जति लामो एपिसोड पनि हुनसक्छ । ५ सिजनका १० घण्टे एपिसोड पनि हुनसक्छ’ उनले भने ।

फिल्म निर्माता मोटवानेको डेब्यु फिचर ‘उडान’लाई कान्समा स्क्रिनिङ गरिएको थियो । विक्रम चन्द्रको सर्वाधिक बिक्री हुने उपन्यासको रूपान्तरण ‘सेक्रेड गेम्स’बाट आफूले श्रृंखलाको ढाँचामा काम गराइको अनुभव सिकेको समेत उनले बताए ।

इन्टरनेसनल फिल्म फेस्टिभल अफ इण्डिया २८ नोभेम्बरसम्म सञ्चालन हुनेछ ।