अन्तिम खेल हार्‍यो लुम्बिनीले, कर्णालीको प्लेअफमा सम्भावना

काठमाडौँ । लुम्बिनी लायन्स पहिलो संस्करणको नेपाल प्रिमियर लिग (एनपीएल) टी–२० क्रिकेटमा कर्णाली याक्ससँगको अन्तिम खेल हारेको छ ।

जितका लागि १२९ रनको चुनौती पछ्यएको लुम्बिनीले २० ओभरमा ७ विकेटको क्षतिमा १२३ रन मात्र बनायो ।

खेलमा टस हारेको कर्णालीले ८ विकेटको क्षतिमा १२८ रन बनाएको थियो ।

जितसँगै कर्णालीले भने आफ्नो प्लेअफ सम्भावनालाई बलियो बनाएको छ । शुरुका दुई खेल हारेपछि निरन्तर चार जितसहित कर्णाली प्लेअफका लागि दाबेदारी दिन सफल भएको हो ।   ६ खेलबाट आठ अंक जोडेको कर्णाली तालिकाको तेस्रो स्थानमा उक्लिएको छ ।

कर्णालीका लागि विलियम बोसिस्टोले ४४ तथा अर्जुन घर्तीले २५ रन बनाएको इनिङ्समा विकाश अग्रीले १४ रन खर्चेर ३ विकेट लिए । विकाशले अन्तिम ओभरमा मात्र ३ रन खर्चेर ३ विकेट लिएका थिए ।  त्यस्तै तिलक भण्डारीले २ विकेट लिए ।

आजको दोस्रो खेलमा विराटनगर किंग्स र चितवन राइनोज भिड्दै छन् । विराटनगर प्लेअफ होडबाट बाहिरिइसकेको छ । यद्यपि अङ्क गणितीय खेल मात्र बाँकी छ ।

त्यस्तै चितवन प्लेअफ नजिक पुगेको छ । ५ खेलबाट ६ अङ्कको चितवन जित्दा प्लेअफ लगभग पक्का हुनेछ ।