काठमाडौं: नेपाल प्रिमियर लिग(एनपीएल)को लिग चरणको खेल सक्किएका छन्। अब प्रतिस्पर्धा अझ रोचक हुनेछन्। 

नेपाली खेलाडीले घरेलु फ्रेन्चाइजबाट राम्रो प्रतिस्पर्धा गरिरहेका छन्। एनपीएलमा राम्रो प्रदर्शन गर्ने म्यान अफ दी सेरिज बन्ने नेपाली खेलाडीले ६२ लाख पर्ने ओमोडाको गाडी पाउनेछन्। 

यो होडमा राम्रो प्रदर्शन गर्ने खेलाडीबीच प्रतिस्पर्धा छ। राष्ट्रिय टोलीका कप्तानसमेत रहेका लुम्बिनी लायन्सका मार्की रोहित पौडेलको टोली अर्को चरणमा प्रवेश नगरेका कारण उनको रेकर्ड तोडेको खण्डमा अन्य नेपाली खेलाडीले उक्त गाडी लैजान सक्नेछन्।

शारडा समूहले उत्कृष्ट खेल खेल्ने नेपाली खेलाडी मध्य एक जनालाई यति महँगो कार दिने सम्झौता नेपाल क्रिकेट संघ क्यानसँग गरेको थियो। अब पुस ६ गते हुने फाइनल खेलका दिनसम्मको प्रस्तुतीकरणले कार चढ्ने खेलाडी फाइनल हुनेछन्। 

रोहित पौडेलले हालसम्म बलिङमा ८ विकेट लिएका छन् भने रनमा शीर्ष स्थानमा नै रहेका छन्।

पौडेलले लिग चरणमा अलराउण्ड प्रदर्शन गरे । टिमले हारिरहँदा पनि उनले उत्कृष्ट प्रदर्शन गरिरहे । लिगमा दुई अर्धशतकसहित उनले सर्वाधिक २७९ रन बनाएका छन् ।

पहिलो खेलमै विराटनगरविरूद्ध ४६ रन बनाएका रोहितले पोखराविरूद्ध सर्वाधिक ९५ रन बनाएका थिए। यस्तै चितवनविरूद्ध ८० रन बनाएका थिए। यसैगरी जनकपुरविरूद्ध ३५ रन बनाएका रोहित सुदूरपश्चिमविरूद्ध ५, काठमान्डुविरूद्ध ८ र कर्णालीविरूद्ध १० रनमा आउट भएका थिए। 

अलराउण्डरद्वय कुशल मल्लले एक अर्धशतकसहित २०२ र दीपेन्द्र सिंह ऐरीले पनि एक अर्धशतकसहित १९८ रन बनाएका छन्। दुवैले अलराउण्ड प्रदर्शन गरिरहेका छन्। कुशल मल्लले सबै खेलमा दोहोरो अंकमा रन बनाएका छन्। उनले काठमान्डु गुर्खाज विरुद्ध ११, पोखरा विरुद्ध ३८, कर्णाली विरुद्ध २३, सुदूरपश्चिम विरुद्ध १३, लुम्बिनी विरुद्ध २०, विराटनगर विरुद्ध २० रन बनाएका थिए भने अन्तिम खेलमा जनकपुर विरुद्ध ७२ रन बनाएका थिए।

उनले हालसम्म सबै खेल गरेर ८ विकेट लिएका छन्। यस हिसाबले अब बाँकी खेलको प्रदर्शन हेरेर मल्ल पनि उक्त ओमोडा गाडी पाउन सक्ने एक दाबेदार हुन्। 

सुदूरपश्चिम रोयल्सका मार्की दीपेन्द्र सिंह ऐरीले भने पहिलो खेलमै विराटनगर विरुद्ध अविजित ५७ रन बनाएका थिए। त्यसपछि ब्याटिङ अर्डर चेन्ज गरिरहेका उनको रन गति पनि चेन्ज भइरह्यो। दोस्रो खेलमा काठमान्डु विरुद्ध ४३ र लुम्बिनी विरुद्ध अविजित ३९ रन बनाएका दीपेन्द्र चितवन विरुद्ध १ र जनकपुर विरुद्ध शुन्यमा आउट भए। त्यसपछि पोखराविरुद्ध २० र कर्णाली विरुद्ध ३८ रन बनाए।

ऐरीले समग्र खेलमा हालसम्म ५ विकेट मात्र लिएका छन्। यद्यपि उनका टीमका खेल अझै बाँकी रहेका कारण रन बढाउने र विकेट समेत बढाउन सक्ने सम्भावना रहेको छ। 

जनकपुर बोल्ट्सका ललितकुमार राजबंशी पनि एक भयानक दाबेदार हुन्। सुरुदेखि नै राम्रो बलिङ गरेका उनले हालसम्म १३ विकेट लिएर सर्वाधिक विकेट लिनेमा दोस्रो स्थान सुरक्षित गरेका छन्। नेपाली खेलाडी मध्यका भने उनी पहिलो हुन्। 

यसैगरी बलिङमा नै चितवन राइनोजका रिजन ढकालको पनि राम्रो प्रदर्शन रहेको छ। उनले पनि राजबंशी जत्ति नै १३ विकेट लिएको र आगामी खेलमा राम्रो प्रदर्शन गरेको खण्डमा ६२ लाखको गाडी चढ्ने भाग्य कोर्न सक्छन्।