रवि लामिछाने आज र भोलि प्रहरी हिरासतमै रहने

काठमाडौं । स्वर्णलक्ष्मी बहुउद्देश्यीय सरकारी संस्थाको बचत अपचलनसम्बन्धी मुद्दामा पूर्वगृहमन्त्री एवं रास्वपा सभापति रवि लामिछाने आज पनि न्यायिक हिरासतमै रहने भएका छन् ।

काठमाडौं जिल्ला अदालतमा जारी थुनछेक बहस लम्बिँदा उनको पक्षबाट आज बहस हुन नसकेको हो ।

न्यायाधीश माधवप्रसाद अधिकारीको इजलासमा चलेको बहसमा सरकारी वकिलहरू खडिन्द्रपराज पन्त, चन्द्रप्रसाद सञ्जेल, सन्तोषराज कटुवाल, राधिका सुवाल र बिना खड्का थापालगायतले बहस गरेका हुन्। जाहेरवालाको पक्षबाट सुरेन्द्र भण्डारी र दिनेश त्रिपाठीले बहस गरेका छन्।

रवि लामिछानेका तर्फबाट भने वरिष्ठ अधिवक्ताद्वय रमनकुमार श्रेष्ठ र सुशील पन्तले बहस गर्न बाँकी छ ।

बिहान बहस सुरु हुनुअघि नै न्यायाधीश अधिकारीले सरकारी वकिलका तर्फबाट २ घन्टा र अभियुक्त रवि लामिछानेका तर्फको बहस सवा १ घण्टामा सक्न निर्देशन दिएका थिए । र ३ बजेभित्र बहस सकेमा आजै आदेश गर्न सकिने बिहानै बताएका थिए। तर सरकारी वकिल र जाहेरवालाका तर्फबाट पनि बहस लम्बिन पुग्दा आज थुनछेक नसकिएको हो । भोलि मंगलबार माघे संक्रान्तिको सार्वजनिक बिदा भएकाले पर्सि बुधबार मात्र बहस हुने भएको हो।