काठमाडौं । नेपाल शिक्षक महासंघले पहिलो चरणका आन्दोलनका कार्यक्रम घोषणा गरेको छ । विगतमा भएका सबै सहमति सम्बोधन हुनेगरी, विद्यार्थी, शिक्षक कर्मचारी मैत्री शिक्षा ऐन जारी गराउन भन्दै महासंघले आन्दोलनका कार्यक्रम घोषणा गरेको हो ।

महासंघले माघ १६ र १७ गते बसेको राष्ट्रिय समितिको बैठकले तयार गरेको पहिलो चरणका आन्दोलनका कार्यक्रमहरु सार्वजनिक गरेको छ ।  माघ २० गतेदेखि गर्ने आन्दोलन विद्यालय शिक्षा जारी नभएसम्म नरोकिने महासंघका अध्यक्ष लक्ष्मी किशोर सुवेदीले जानकारी दिए ।

महासंघले स्थानीय, जिल्ला, प्रदेश र राष्ट्रियस्तरमा विभाजन गरी आन्दोलनको तालिका सार्वजनिक गरेकाे हो ।

आन्दोलनको तालिका

-२०८१ माघ २५ गते दिउँसो १ बजे सबै पालिकामा ध्यानाकर्षण तथा जानकारीपत्र बुझाउने । सोही दिनमा आन्दोलन परिचालन समिति गठन गर्ने ।

-माघ २९ गते हरेक विद्याालयमा विद्यार्थी, अभिभावक विद्यालय व्यवस्थापन समिति विच अन्तरक्रिया कार्यक्रमको आयोजन गर्ने र शिक्षक कर्मचारीका माग तथा आन्दोलनको आवश्यकताबारे सुसूचित गर्ने ।

-माघ ३० गते पालिका कार्यलयमा भेला भई ‘हाम्रा माग सम्बोधन हुने गरी यो हिउँदे अधिवेशनबाट विद्यालय शिक्षा ऐन जारी गरियोस्’ भन्ने नारासहित हातमा कालोपट्टी बाँधेर खबरदारी जुलुस प्रदर्शन गर्ने ।

-फागुन २ गते देशका ७७ वटै जिल्लाको शिक्षा विकास तथा समन्वय एकाइमा ध्यानाकर्षण तथा जानकारी पत्र बुझाउने ।

-फागुन ११ गते संघीय सांसदलाई सरकार र महासंघबीच भएका विगतका सबै सहमति समावेश गरी ध्यानाकर्षण पत्र बुझाउने ।