टिकटक भिडियोले बदनाम गर्‍यो भन्दै बुबाले गरे छोरीको हत्या

काठमाडौं । टिकटकमा भिडिओ शेयर गरेको विषयमा विवाद बढेपछि पाकिस्तानमा एक १५ वर्षीया अमेरिकी किशोरीको आफ्नै बुवाले हत्या गरेका छन् ।

पाकिस्तानी अधिकारीहरूका अनुसार क्वेटा सहरमा मंगलबार साँझ सडकमा गोली हानेर किशोरीको हत्या गरिएको हो । सुरुमा आरोपी अनवर उल-हकले अज्ञात व्यक्तिले गोली हानेको दाबी गरे पनि पछि आफैंले छोरीलाई मारेको स्वीकार गरेका छन् ।

अनुसन्धान अधिकारीहरूका अनुसार परिवारले किशोरीको लुगा लगाउने शैली, जीवनशैली र सामाजिक घुलमिलप्रति आपत्ति जनाएको थियो । प्रहरीले उनको मोबाइल फोन नियन्त्रणमा लिएर अनुसन्धान गरिरहेको जनाएको छ ।

अनवरको परिवार करिब २५ वर्षसम्म अमेरिकामा बसेर केही समयअघि मात्र पाकिस्तान फर्किएको थियो । बुवाले छोरी अमेरिकामा हुँदा नै ‘आपत्तिजनक’ सामग्री टिकटकमा अपलोड गर्न थालेको बताएका छन् । पाकिस्तान फर्किएपछि पनि छोरीले त्यस्तो कार्य जारी राखेपछि हत्या गरेको अनवरले बयान दिएका छन् ।

पाकिस्तानी प्रहरीले हत्यामा संलग्न भएको आरोपमा मुख्य आरोपीका भिनाजुलाई पनि पक्राउ गरेको बीबीसीले जनाएको छ ।

पाकिस्तानमा टिकटकका पाँच करोड ४० लाखभन्दा बढी प्रयोगकर्ता छन् । सरकारले विभिन्न समयहरूमा सामग्री नियन्त्रणको कारण देखाउँदै एपमाथि प्रतिबन्ध लगाउँदै आएको छ ।

मानव अधिकार आयोगका अनुसार पाकिस्तानमा हरेक वर्ष एक हजारभन्दा बढी महिलाहरू परिवार वा समुदायका सदस्यहरूद्वारा तथाकथित ‘इज्जतको नाममा’ हत्या गरिन्छन् । सामाजिक सञ्जालमा सामग्री पोस्ट गर्ने, पुरुषहरूसँग खुलेर बोलचाल गर्ने वा परिवारको इच्छाविपरीत बिहे गर्ने जस्ता कारणले पनि महिलाहरू हिंसाको शिकार बन्ने गरेका छन् ।