राष्ट्रिय सभाको बैठकमै ढले सांसद भट्ट, उपचार हुदै

काठमाण्डौं, २० माघ ।
राष्ट्रिय सभा बैठक चलिरहँदा नेपाली काँग्रेसका तर्फबाट निर्वाचित सांसद नारायणदत्त भट्ट बैठकमै ढलेका छन् ।

उच्च रक्तचाप र सुगरका बिरामी भट्ट उच्च रक्तचापका कारण बैठकमै ढलेको बताईएको छ ।

राष्ट्रिय सभाको आजको बैठकमा बोल्न नाम टिपाएका भट्ट बोल्नुअघि नै ढलेका हुन् । भट्ट अस्वस्थ भएपछि राष्ट्रिय सभा अध्यक्ष नारायणप्रसाद दाहालले कांग्रेस सांसद विष्णुकुमारी सापकोटालाई बोल्ने समय दिए ।

‘माननीय नारायणदत्त भट्ट अस्वस्थ भएका कारणले सम्बन्धित दलबाट माननीय विष्णुकुमारी सापकोटाले बोल्ने कुरा भएकाले उहाँ माननीयलाई समय दिन्छु,’ दाहालले भने ।

अहिले उनको संसद् भवनभित्रै उपचार भइरहेको छ । ‘राष्ट्रियसभाको स्वास्थ्य कक्षमा माननीयज्यूको उपचार भइरहेको छ,’ स्रोतले भन्यो ।

नेपाली काँग्रेस कैलालीका सभापति भट्ट अपांग कोटामा नेपाली काँग्रेसका तर्फबाट राष्ट्रियसभाको सांसदमा निर्वाचित भएका थिए ।