हलिउड अभिनेता जीन ह्याकम्यान दम्पती मृत फेला

काठमाडौं । अस्कर विजेता अमेरिकी अभिनेता जीन ह्याकम्यान र उनकी श्रीमती बेट्सी अराकावा मृत अवस्थामा फेला परेका छन् ।

न्यू मेक्सिकोको सान्ता फेस्थित आफ्नै घरमा उनीहरु मृत फेला परेको बीबीसीले जनाएको छ ।

न्यु मेक्सिकोको सान्ता फे काउन्टी शेरिफको एक विज्ञप्तिमा भनिएको छ, “हामी पुष्टि गर्न सक्छौँ कि जीन ह्याकम्यान र उनकी श्रीमती दुवै बुधबार दिउँसो सनसेट ट्रेलमा रहेको उनीहरूको निवासमा मृत फेला परेका थिए।”

सान्ता फे काउन्टी शेरिफको कार्यालयले भन्यो, “२६ फेब्रुअरी, २०२५ मा लगभग १:४५ बजे सान्ता फे काउन्टी शेरिफका डेपुटीहरूलाई हाइड पार्कको ओल्ड सनसेट ट्रेलमा रहेको ठेगानामा पठाइएको थियो, जहाँ ९५ वर्षीय जीन ह्याकम्यान र उनकी श्रीमती ६४ वर्षीया बेट्सी अराकावा र एउटा कुकुर मृत अवस्थामा फेला परेका थिए।”

घटनाको अनुसन्धान भइरहेको बताइएको छ ।

छ दशकभन्दा लामो फिल्मी करियरमा ह्याकम्यानले द फ्रेन्च कनेक्सन र द अनफर्गिभनमा आफ्नो कामको लागि दुईवटा एकेडेमी अवार्ड प्राप्त गरेका थिए ।

उनले विलियम फ्राइडकिनको सन् १९७१ को थ्रिलर फिल्म द फ्रेन्च कनेक्सनमा जिमी ‘पोपे’ डोयलको भूमिकाको लागि उत्कृष्ट अभिनेताको ओस्कार जितेका थिए भने सन् १९९२ मा क्लिन्ट इस्टवुडको वेस्टर्न फिल्म अनफर्गिभनमा लिटिल बिल ड्यागेटको भूमिकाको लागि उत्कृष्ट सहायक अभिनेताको लागि अर्को पुरस्कार जिते।