बैतडीमा स्कुल बसको ढोकाबाट खसेर शिक्षकको मृत्यु

बैतडीः स्कुल बसको ढोकाबाट खसेर बैतडीमा एक शिक्षकको मृत्यु भएको छ।

शनिवार दार्चुलाको शैल्यशिखर नगरपालिका–९ गोकुलेश्वरस्थित चौलानी बोर्डिङ स्कुलमा कार्यरत बैतडीको दोगडाकेदार गाउँपालिका–४ कपिन्नाका २८ वर्षीय विष्णुराज भट्टको मृत्यु भएको हो। विद्यार्थी भर्ना अभियान प्रचारप्रसारका क्रममा गोकुलेश्वरबाट पन्ज्युनयाँतर्फ गइरहेका बेला महाकाली राजमार्गअन्तर्गत बैतडीको डिलासैनी गाउँपालिका–६ बाँगाबगरमा बसको ढोकाबाट खसेर उनी गम्भीर घाइते भएका थिए।

शिक्षक भट्टको गोकुलेश्वर अस्पतालमा उपचारका क्रममा मृत्यु भएको जिल्ला प्रहरी कार्यालयका प्रहरी निरीक्षक बलदेव बडूले जानकारी दिए। घटनापश्चात बस चालक दार्चुलाको शैल्यशिखर नगरपालिका–५ का उत्तरसिंह डाँगालाई प्रहरीले नियन्त्रणमा लिएको छ।