‘मिस नेपाल नर्थ अमेरिका २०२५’को जजमा प्रदीप, अनुप, नीति, आँचल

काठमाडौं । ‘मिस नेपाल नर्थ अमेरिका २०२५’का ५ जना जज (निर्णायक) घोषणा गरिएको छ । आयोजक संस्था ड्रीम्स युनिभर्सलले विज्ञप्ति जारी गर्दै जजको नाम खुलाएको हो ।

जजमा पूर्वमिस नेपाल सदीक्षा श्रेष्ठ, अभिनेताद्वय प्रदीप खड्का र अनुपविक्रम शाही, अभिनेत्रीद्वय आँचल शर्मा र नीति शाह छन् । यी सबै सेलिब्रेटीले २ अगस्टमा अमेरिकाको न्यूयोर्कमा हुने फिनालेमा सहभागिता जनाउनेछन् ।

उक्त मितिमा क्वीन्सको मेलरोज बलरुममा समारोह हुनेछ । आयोजक संस्थाका प्रमुख शैलेन्द्र श्रेष्ठले जजको नाम घोषणासँगै अब क्लोज क्याम्प सुरु हुने बताए ।

उनका अनुसार जुलाई २७ बाट बाल्टिमोरमा क्लोज क्याम्प सुरु हुनेछ, जहाँ १९ जना फाइनलिस्ट सहभागी हुनेछन् । उनीहरूलाई फिनालेको लागि आवश्यक तयारी र प्रशिक्षण कला सिकाइनेछ ।

आर्या आचार्य (पेन्सिलभेनिया), अमिसा भण्डारी (न्यूयोर्क), आर्या कोइराला (टेक्सास), बिना श्रेष्ठ (जर्जिया), दीपा गुरुङ (कोलोराडो), दीया श्रेष्ठ (न्यूजर्सी), हारा सुवेदी (न्यूयोर्क), कृष्मा सुवेदी (टिनिस), कुस्मिता खड्का (टेक्सास), कुसुम तिमल्सिना (टेक्सास) फाइनलिस्ट बनेका छन् ।

साथै, मिङ्मा वाई शेर्पा (कोलोराडो), मुना विष्ट (टेक्सास), नवीना लिम्बु (न्यूयोर्क), प्रतिमा श्रेष्ठ (टेक्सास), सब्बु बजिमय (भर्जिनिया), संस्कृति पाण्डे (कनेक्टिकट), सरिता तामाङ (न्यूयोर्क), स्नेह उपखेती (टेक्सास) र सुस्जिता पौडेल (मिनेसोटा) फाइनलिस्ट बनेका छन् ।

यो प्रतियोगिताको विजेताले मिस नेपालमा सीधै प्रवेश पाउनेछन् ।