कैलालीको कैलारीमा एक महिना नपुग्दै भत्कियो ४४ लाखको तटबन्ध

धनगढी : कैलालीको कैलारी गाउँपालिका–७ स्थित बर्का वसन्ता र छटकपुर वसन्ताको बिचमा कटैनी नदीको तटबन्ध एक महिना नहुँदै भत्किएको छ।

सुदूरपश्चिम प्रदेश सरकारको ४४ लाख रुपियाँ खर्चेर बनाइएको तटबन्धलाई खेतबाट आएको पानीले भत्काएको हो । १५ मिटर तटबन्ध भत्केको छ ।

जलस्रोत तथा सिँचाइ डिभिजन कार्यालयले उपभोक्ता समितिमार्फत एक सय आठ मिटर तटबन्धन बनाएको थियो। गत जेठबाट निर्माणको काम सुरु भई असार पहिलो साता पूरा भएको वडा सदस्य टुनीराम चौधरीले बताए । उनले उपभोक्ता समितिको कमीकमजोरीका कारण बेइज्जत भएको बताएका छन्।

सुरक्षाका लागि बनाइएको तटबन्ध नै भत्केपछि स्थानीय आक्रोशित भएका छन्। उनीहरूले तटबन्ध निर्माणमा आर्थिक हिनामिना भएको आरोपसमेत लगाएका छन्। स्थानीय बलबहादुर चौधरीले भने, “तटबन्धमा स्लोप बनाइएन। त्यसैले खेतबाट आएको बर्सातको पानीले तटबन्ध बगाएको हो।”

पाँच फिट उचाइ बनाउने भनिएको तटबन्ध होचो बनाइएका कारण पनि भत्केको स्थानीयको गुनासो छ। होचो तटबन्ध बनाएर माटो, बालुवाको ड्याम उठाइ पाँच फिट पु¥याइएको उनीहरूले जिकिर गरेका छन्। भलमनसा बाबुराम चौधरीले तटबन्धका लागि उपभोक्ता समिति निर्माण गर्न बोलाएको वडा कार्यालयले पहिले नै समिति बनिसकेको कागज देखाएको बताउनुभयो । बताए।

बिग्रे, भत्केको ठाउँमा पुनः बनाउनका लागि समितिलाई भनिसकेको जलस्रोत तथा सिँचाइ डिभिजन कार्यालयका सूचना अधिकारी इन्जिनियर टेकराज बिनाडीले बताए। बिग्रेको ठाउँमा मर्मत नगरे समितिलाई धरौटी फिर्ता नदिने बिनाडीले बताए। उपभोक्ता समितिले डिभिजन कार्यालयमा दुई लाख रुपियाँ धरौटी राखेको छ।

कटानबाट खेत जोगाउनका लागि बनाइएको तटबन्ध खेतबाटै झरेको पानीले भत्किएको हो।