तत्काल आन्दोलन नगर्ने एन प्याब्सनको निर्णय, शिक्षा विधेयक संशोधन गर्न माग
कैलाली । राष्ट्रिय निजी तथा आवासीय विद्यालय एसोसिएसन नेपाल (एन प्याब्सन) ले तत्काल आन्दोलन नगर्ने निर्णय गरेको छ । तर शिक्षा विधेयक संशोधन गर्न पहल गर्ने जनाएको छ ।
बुधवार धनगढीमा आयोजित पत्रकार सम्मेलनमार्फत संगठनले शिक्षामा देखिएका समस्याहरुलाई छलफल गर्दै वार्ताबाटै समाधान गर्न अगाडि बढिरहेको जानकारी दिएको छ ।
निजी र सरकारी विद्यालयका सम्पुर्ण विद्यार्थीहरुले समान रुपले छात्रवृत्ति पाउनुपर्ने र सामाजिक सुरक्षा कोष अनिवार्य मात्रै नभई स्वेच्छिक हुनुपर्ने संस्थाको मान्यता रहेको प्याब्सनका सह–केन्द्रिय उपाध्यक्ष हेमराज जोशीले बताए ।
यस्तै, हाल नेसनल प्याब्सन विद्यालय बन्द, हडतालको पक्षमा नरहेको बताउँदै आउन लागेको शिक्षा ऐन समावेश गरिने विषयहरु संवाद छलफल र अन्र्तरक्रियाको माध्यमबाट विद्यार्थी, अभिभावक, शिक्षक, कर्मचारी तथा निजी लगानीकर्ता र समग्रमा मुलुकका शिक्षा क्षेत्रको कोशेढुंगा सावित होस भन्ने नेसनल प्याब्सनको चाहना रहेको संगठनको प्रेस विज्ञप्तिमा उल्लेख गरिएको छ ।
एन प्याब्सनका केन्द्रिय सल्लाहकार तथा अनुशासन आयोगका अध्यक्ष दुर्गा जोशीले सरकारद्वारा निजी विद्यालयलाई विशिष्ट श्रेणी (क, ख, ग, घ) मा वर्गीकरण गरेर शुल्क निर्धारण गर्ने प्रावधान शिक्षा क्षेत्रमा नियन्त्रणकारी कदम भएको बताए। साथै, “पूर्ण छात्रवृत्ति” को प्रावधान अव्यवहारिक भएको भन्दै यसले शिक्षामा असमानता बढाउने र निजी विद्यालयलाई थप दवावमा पार्ने बताए ।
तपाईको प्रतिक्रिया