शेयर बजारमा अर्धशतकीय वृद्धि, कारोबार रकम साढे ७ अर्ब माथि

काठ्माण्डौँ । शेयर बजारमा बुधबार उच्च अंकको वृद्धि देखिएको छ ।

लामो गिरावटपछि नेप्से परिसूचक ५३.०१ अंकले बढेर २८१९.१० बिन्दुमा कायम भएको हो ।

३ हजार बिन्दुमाथि पुगेर झर्न थालेको बजारमा अघिल्ला २ दिन सामान्य वृद्धि देखिएको थियो ।

बुधबार कारोबार रकम पनि बढेको छ । १ करोड ४९ लाख ८६ हजार कित्ता शेयर किनबेच हुँदा ७ अर्ब ६८ करोड ३३ लाख बराबरको कारोबार भएको छ ।

समूहगत रूपमा विकास बैंक सबैभन्दा बढी ३.४० प्रतिशतले बढेको छ ।

यस्तै, उत्पादन, जीवन बिमा, व्यापार, अन्य र लगानी समूह पनि २ प्रतिशत माथिले बढेका छन् । यसबाहेकका सेक्टरमा पनि नेप्सेको औसतकै हाराहारीमा वृद्धि भएको छ ।

विकास हाइड्रोपावर कम्पनीका लगानीकर्ताहरूले सर्वाधिक नाफा कमाएका छन् ।

सो कम्पनीको शेयर मूल्य सर्वाधिक १० प्रतिशतले बढेको छ । त्यस्तै, कारोबारका आधारमा भने हिमालयन रिइन्स्योरेन्स लिमिटेड शीर्ष स्थानमा रहेको छ । 

बुधबारको वृद्धिपछि बजार पुँजीकरण ४७ खर्ब १० अर्ब रुपैयाँ रहेको छ ।