न्यूयोर्कमा धुमधामसंग गौरा पर्व मनाईदै
न्यूयोर्क, २८ अगष्ट
सुदूरपश्चिम समाज अमेरिका, न्यूयोर्कको आयोजनामा बिगतमा झै यस वर्ष पनि गौरा पर्व धुमधामसंग मनाईने भएको छ ।
गौरा पर्वका संयोजक रैभान महराले सुदूरपश्चिमको गौरा पर्वका अवसरमा सुदूरपश्चिमेली परम्परागत बाजा दाईना दमाऊको नाच सहित गौरा प्रदर्शन गरिने बताए ।
उनले गौरा पर्वमा महिलाहरुको अठेवाली वाचन, वालो खेलाउने (गौरादेवी र महेश्वरलाई नचाउने), विरुडा सहित फल फड्काउने र प्रसाद वितरण, देउडा खेल, गौरा सेलाउने लगायतका गतिबिधि गरिने जानकारी दिए ।
गौरा पर्वमा प्रमुख अतिथिका रुपमा महावाणिज्यदूत दधिराम भण्डारी र विशिष्ट अतिथिका रुपमा चर्चित देउडा गायक नन्दकृष्ण जोशी सहभागी हुने समाजका अध्यक्ष दान सिंह बिष्टले बताए ।
अध्यक्ष बिष्टले गौरा पर्वमा सहभागिताका लागि न्यूयोर्कमा सुदूरपश्चिमेलीसंगै नेपाली समुदायलाई सहभागी भईदिन आग्रह गरे ।
अगष्ट ३० को साँझ ५ देखि १० बजेसम्म न्यूयोर्कको वुडसाईडस्थित दिव्यधाममा आयोजना हुने गौरा पर्वमा देउडा गायक जोशीका चर्चित देउडाहरु सुन्न पाईने अध्यक्ष बिष्टले बताए ।
तपाईको प्रतिक्रिया