टेक्सासमा गौरा पर्व मनाईदै, रेखा जोशी र रवि वडको प्रस्तुति रहने
टेक्सास, २८ अगष्ट ।
सुदूर पश्चिमको मौलिक पर्व गौरा अमेरिकाको टेक्सासमा धुमधामसंग मनाईदैछ ।
सुदूर पश्चिम नेपाली समाज टेक्सास र ग्रेटर अष्टिन नेपाली सोसाईटीको आयोजनामा अगष्ट ३० तारेखमा अष्टिनमा र ३१ अगष्टमा ड्यालसमा गौरा पर्व मनाईने भएको हो ।
सुदूर पश्चिम नेपाली समाज टेक्सासका अध्यक्ष गगन केसीले ग्रेटर अष्टिन नेपाली सोसाईटीको आयोजनामा टेक्सासको अष्टिन र ड्यालसमा गौरा पर्व धुमधामसंग मनाउन लागिएको जानकारी दिए ।
अध्यक्ष केसीले सुदूरपश्चिमको मौलिक पर्व गौराका अवसरमा गौरादेवी र महेश्वरलाई नचाउने, प्रसाद वितरण, देउडा खेल, गौरा सेलाउने लगायतका गतिबिधि गरिने जानकारी दिए ।
गौरा पर्वका अवसरमा आयोजना गरिने सांस्कृतिक कार्यक्रममा सुदूर पश्चिमकी चर्चित गायिका रेखा जोशी र नेपाल आईडल रवि ओडको विशेष सांगितिक प्रस्तुति रहने छ । पछिल्लो समय जोशीको ‘सुन हौ कि चाँदी हौ’ बोलको गीत चर्चित छ ।
अष्टिनको हटोमा अगष्ट ३० तारेख शनिवार अपरान्ह चार बजे गौरा पर्व शुरु हुनेछ । त्यस्तै ड्यालसको पशुपतिनाथ बुद्ध मन्दिरमा अगष्ट ३१ तारेख आईतवार गौरा पर्व मनाईनेछ ।
दुबै स्थानमा गौरा पर्वका अवसरमा आयोजना हुने सांस्कृतिक कार्यक्रममा प्रवेश निशुल्क रहेको समाजका अध्यक्ष केसीले बताए ।
अध्यक्ष केसीले गौरा पर्वमा सहभागी हुन सुदूरपश्चिमेलीसंगै नेपाली समुदायलाई आग्रह गरे ।
तपाईको प्रतिक्रिया