आसामविरुद्ध नेपाल ‘ए’ को सानदार जित, युवराज खत्रीको उत्कृष्ट बलिङ

काठ्माण्डौँ । भारतको गुवाहाटीमा जारी टी–२० सिरिजमा नेपाल ‘ए’ टोलीले पहिलो जित दर्ता गरेको छ । पहिलो जित दर्ता गर्नेक्रममा नेपालले शुक्रबार घरेलु टिम आसामलाई ९६ रनले हरायो । योसँगै सिरिज १–१ को स्थितिमा आएको छ ।

पहिलो खेलमा नेपाल डकवर्थ लुइस पद्धतिअनुसार १५ रनको हार बेहोरेको थियो । पहिलो खेलमा १९० रन बनाएको आसामले दोस्रो टी–२० मा भने निकै खराब ब्याटिङ गर्यो ।

शुक्रबारको खेलमा नेपालले दिएको १ सय ७४ रनको लक्ष्य पछ्याएको आसाम १५.२ ओभरमा ७७ रनमै अलआउट भयो । उसलाई सस्तैमा समेट्न आज मात्र ‘ए’ टिमबाट डेब्यू गरेका युवा स्पिनर युवराज खत्रीले जादुमयी बलिङ गरे ।

उनले ३.२ ओभरमा १५ रन मात्र दिएर सर्वाधिक चार विकेट लिए । यस्तै, बसिर अहमदले तीन विकेट हात पारे । त्यसअघि टस जितेर पहिले ब्याटिङ गरेको नेपालले निर्धारित २० ओभरमा ७ विकेट गुमाउँदै १ सय ७३ रनको योगफल खडा गर्‍यो ।