काठ्माण्डौँ । एकता पौडेलको डेव्यु निर्देशकीय सिनेमा 'हर्ष' को फर्स्टलुक पोस्टर सार्वजनिक भएको छ। सोमबार बिहान सिनेमाका दुई पोस्टर सार्वजनिक गरिएका हुन्। सिनेमा मंसिर १२ गते रिलिज हुँदैछ।

सार्वजनिक दुवै पोस्टरमा सिनेमाका मुख्य कलाकारहरूलाई प्रस्तुत गरिएको छ। सार्वजनिक दुवै पोस्टरमध्ये एकमा अभिनेता खगेन्द्र लामिछाने, अभिनेत्री वर्षा राउत र शर्मिला मल्ललाई सिनेमाको नाम जस्तै हर्षित भावमा अर्थात् मिठो मुस्कानमा देख्न सकिन्छ भने सन्तोष पन्तलाई केही असन्तुष्ट भावमा छड्के हेराइ हेरिरहेको देख्न सकिन्छ।

यो पोस्टरमा खगेन्द्र र वर्षालाई छोरासँग रमाइरहेको देख्न सकिन्छ। छोराको भूमिका गर्ने बालकलाकार साइमन वादी हुन्। यसैगरी दोस्राे पोस्टरमा खगेन्द्र र वर्षालाई पहिलो पोस्टरमा जस्तै मीठो मुस्कानमा देख्न सकिन्छ।

नेपथ्यमा सम्भवतः सिनेमाको गीतको दृश्य हुनुपर्छ जहाँ सन्तोष पन्तको साथमा विशाल पहारी, लुनिभा तुलाधर, माओत्से गुरुङ र अंशु महर्जनलाई नाचिरहेको-रमाइरहेको देख्न सकिन्छ।

यो पोस्टरमा बालकलाकार साइमनलाई बाल कृष्णको पहिरनमा पेस गरिएको छ। यस्तै अभिनेता नीर शाहलाई गम्भीर भावमा देख्न सकिन्छ। सार्वजनिक यी दुई पोस्टरले पारिवारिक जीवनका उकालीओरालीको कथा पेस गर्ने स्पष्ट बुझ्न सकिन्छ। यस हिसाबले धेरै समयपछि दर्शकहरूको पारिवारिक ड्रामा हेर्न पाउनेछन्।

डेब्यू निर्देशक एकता पौडेलले आफ्ना दिवंगत मामा निर्देशक शिव रेग्मी- जो पारिवारिक सिनेमाका लागि परिचित छन् उनकै विरासत समातेको बुझ्न सकिन्छ। यसअघि टाइटल भिडियो पनि उनले आफ्ना मामा सम्झिंदै सार्वजनिक गरेकी थिइन्।

निर्देशक पौडेल न्यूयोर्क फिल्म एकेडेमीमा सिनेमा मेकिङ अध्ययन तथा आमसञ्चारमा स्नातक गरेकी छन्। व्यवस्थापन तथा नेतृत्व विषयमा स्नातकोत्तर गरेकी निर्देशक पौडेलले यसअघि छाेटा केही सिनेमा समेत निर्माण गरिसकेकी छन्।

सम्पूर्ण छायांकन चितवनमा नै गरिएको सिनेमा हाल पोष्ट प्रोडक्सनको चरणमा रहेको छ। पौडेलले आफू र आफ्नो टिमले दर्शकलाई ‘हर्ष’ सिनेमा उत्कृष्ट रूपमा पस्किने बताउँदै आइरहेकी छन्।

सिनेमामा खगेन्द्र लामिछाने, वर्षा राउत, निर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन, संगीता नापित तथा बाल कलाकार साइमन वादीको अभिनय छ।

अष्टलक्ष्मी प्रोडक्सन्स् र ई-प्राईम मुभिजको ब्यानरमा निर्माण भएको सिनेमाको कथा स्वयं निर्देशक पौडेलले लेखेकी हुन्। सिनेमामा आलोक शुक्लाको छयांकन, समीर/हिमाल, वसन्त सापकोटा तथा एलिश कार्कीको संगीत, लोकेश बज्राचार्यको सम्पादन तथा सुनिल क्षेत्री र निर्देशक पौडेलको कोरियोग्राफी छ।

सिनेमाका निर्माता प्रसन्न पौडेल र विकास पौडेल तथा कार्यकारी निर्मातामा हिक्मत चोखल छन्। सिनेमामा शिव रेग्मी, डा. कृष्णहरि बराल, पवित्रा घिमिरे, नीरकमल खड्काको शब्द रचना, ईश्वर घिमिरे प्रोडक्सन म्यानेजर, कुलदीप अधिकारी मुख्य सहायक निर्देशक छन्। गोविन्द शाहीको काफिया फिल्मस्ले वितरण गर्ने सिनेमाको डिजिटल राइट्स बुढासुब्बा डिजिटलले किनेको छ।