कानुनी लफडामा फस्यो कपिल शर्माको शो
एजेन्सी । प्रोड्युसर फिरोज नाडियाडवालाले नेटफ्लिक्सलाई ‘हेरा फेरी’ फ्रेन्चाइजको बाबुराव गणपत राव आप्टेको भूमिकाबारे कानुनी नोटिस पठाए।
प्रोड्युसर फिरोज नाडियाडवालाले नेटफ्लिक्सलाई हेरा फेरी फ्रेन्चाइजको आइकोनिक पात्र बाबुराव गणपत राव आप्टेको भूमिका बिना अनुमति प्रयोग गरेको भन्दै कानुनी कारबाही अघि बढाएका छन्।
नाडियाडवालाका वकिल सना रईस खानले भनेका छन्, “बौद्धिक सम्पत्ति कुनै साधारण कुरा होइन, यो सिर्जनशीलताको आत्मा हो। मेरो क्लाइन्टको आइकोनिक पात्रलाई बिना अनुमति प्रयोग गर्नु मात्र उल्लंघन होइन, यो सबैभन्दा स्पष्ट व्यावसायिक चोरी हो। कानुनले त्यस्ता कानुनी रूपमा प्राप्त र सुरक्षित अधिकारलाई कमजोर हुन दिनेछैन।”
मिडिया रिपोर्टअनुसार नाडियाडवालाले करिब २५ करोड रुपैयाँको कानुनी नोटिस पठाएका छन्। तर, यसबारे आधिकारिक पुष्टि भइसकेको छैन।
यसबीच, अभिनेता अक्षय कुमार पहिलो पटक द ग्रेट इन्डियन कपिल शो मा देखिएका छन्। शोको अन्तिम एपिसोडको प्रोमोमा हास्य कलाकार कीकु शारदा बाबुरावजस्तै भूमिका गर्दै “ये बाबुराव का स्टाइल है” भन्ने आइकोनिक डायलग बोलेका देखिन्छन्।
बाबुरावको भूमिका मूलत: अभिनेता परेश रावलले हेरा फेरी (२०००) र फिर हेरा फेरी (२००६) मा निर्वाह गरेका थिए। पहिलो फिल्म प्रियदर्शनले निर्देशन गरेका थिए भने दोस्रो फिल्म स्व. नीरज वोरा निर्देशक थिए। यी दुवै फिल्ममा अक्षय कुमार र सुनील शेट्टी पनि मुख्य भूमिकामा थिए।
अब फेरि यी तीनै कलाकार हेरा फेरी ३ मा एकसाथ देखिनेछन्। फिल्ममा बाबुराव, श्याम र राजूका पात्रलाई पुनः प्रस्तुत गरिनेछ। यसपटक पनि निर्देशन प्रियदर्शनले गर्ने भएका छन्।
तपाईको प्रतिक्रिया