बलिउड अभिनेत्री स्वरा भास्करले दिल्लीको वसन्त कुञ्ज नर्थ थानामा एफआईआर दर्ता गराएकी छन् । उनले ट्वीटर र युट्युबमा सक्रिय एक व्यक्तिले स्वराको फिल्मको एक दृश्य सामाजिक सञ्जालमा राख्दै आफ्नो पहिचान खराब बनाएको आरोप लगाएकी छन् । प्रहरीले आइटी एक्ट र एक अन्य धारा अनुसार निवेदन दर्ता गरेर छानविन सुरु गरेको छ ।

यो मुद्धा आपीसीको धारा ३५४ डी, ५०९(शब्द, हाउभाउ या कुनै महिलालाई अपमान गर्ने मनसाय) र आइटी एक्टको धारा ६७(विद्युत्तीय माध्यमबाट अश्लील सामाग्री प्रकाशन या प्रसारण गर्दाको सजाय)का अनुसार दर्ता गरिएको छ ।

केही दिन अघि फिल्म ‘वीरे दी वेडिङ’को मास्टरबेशनवाला दृश्य सामाजिक सञ्जालमा भाइरल भएको थियो । स्वराको यही विषयमा आपत्ति हो । ‘मेरा साथीहरु यो साइबर यौन उत्पीडन हो । सार्वजनिक क्षेत्रमा महिलाले सामना गर्नुपर्ने चुनौतिको बारेमा आउनुहोस् छलफल गरौं । प्रिय ट्वीटर आउनुहोस् कुरा गरौं कि कसरी तपाईंको प्लेटफर्म महिलाका लागि सुरक्षित बनाउन सकिन्छ ?’, स्वराले ट्वीट गरेकी छन् ।

स्वरा प्रायः सामाजिक सञ्जालमा ट्रोलर्सको निशानामा परिरहन्छिन् । कहिले उनी आफ्नो गृहप्रवेशको तस्वीरलाई लिएर त कहिले कुनै फिल्मको दृश्यलाई लिएर ट्रोल बन्छिन् ।