आज २ हजार ६ सयले घट्यो सुनको मूल्य,

काठमाडौँ- सरकारले भन्सार दर घटाएपछि सोमबार नेपाली बजारमा उच्च गिरावट देखिएको सूनको मूल्य आज पनि घटेको छ।

आज सुन प्रतितोला रू दुई हजार छ सयले घटेर एक लाख ४८ हजार सात सय कायम भएको नेपाल सुनचाँदी व्यवसायी महासंघले जनाएको  ।

त्यस्तै, चाँदी प्रतितोला रू २५ ले घटेर रु एक हजार आठ सय २० कायम भएको छ।

यसअघि हिजो सोमबार पनि सुनको मूल्य एकैदिन करिब १६ हजार घटेको थियो। सोमबार छापावाल सुन प्रतितोला १५ हजार ९०० रुपैयाँले घटेर १ लाख ५१ हजार रुपैयाँमा झरेको थियो। यसअघि, आइतबार छापावाल सुन १ लाख ६७ हजार २०० रुपैयाँ कायम रहेको थियो।

सरकारले हालै सुन-चाँदीमा लाग्ने भन्सार महसुल दर घटाएको छ। महसुल दर २० प्रतिशतबाट घटाएर १० प्रतिशतमा झारेपछि जसको प्रत्यक्ष प्रभाव मूल्यमा पर्न गएको हो।