सिनामंगल घटनामा मृतकका परिवारले भने, ‘क्यानडाबाट नेपाल आउने थाहै थिएन’

काठमाडौँ । सिनामंगलस्थित होटेल जन्मभूमिको चौथो तलामा मंसिर ९ गते मृतावस्थामा भेटिएका रमेश माझी र शर्मिला माझीको शव परिवारले बुझेका छन् । त्रिवि शिक्षण अस्पतालमा पोस्टमार्टम पछि आफन्तले शव बुझेको जिल्ला प्रहरी परिसर काठमाडौँका एसपी नवराज अधिकारीले रातोपाटीलाई बताए ।

रमेश र शर्मिला दम्पती हुन् । सुनसरीको दुहबी घर भएका उनीहरू मंसिर ८ गते बिहान कतार एयरलाइन्सको उडानमार्फत क्यानडाबाट काठमाडौँ आएका थिए । तर, क्यानडाबाट उनीहरू काठमाडौँ ओर्लिएको बारेमा परिवारका सदस्यहरू नै बेखबर थिए । होटेलमा झुन्डिएको अवस्थामा शव भेटिएको भनेर प्रहरीले खबर गर्दा रमेशका बुवाआमाले नपत्याएको अनुसन्धानमा संलग्न एक जना प्रहरी अधिकृतले  बताए । ती अधिकृत भन्छन्, ‘हाम्रो छोरा बुहारी क्यानडामा छन्, भनेर उहाँहरूले पत्याउनुभएन।’

सुनसरीबाट काठमाडौँ आएर परिवारका सदस्यहरूले प्रहरी वृत्त गौशालामा घटनाबारे अनुसन्धानका लागि जाहेरी दिएका छन् । प्रहरीसँग परिवारका सदस्यहरूले अनुसन्धान अधिकृतहरूसँग भनेका छन्, ‘उनीहरू नेपाल आउनको कुरा थाहै थिएन ।’

दुई वर्ष क्यानडा बसेर नेपाल फर्किएका उनीहरूको ४ वर्षीया छोरा छन् । दुई वर्षको छोरा छाडेर क्यानडा गएका उनीहरू त्यहाँबाट काठमाडौँ आएपछि सिधै एयरपोर्ट नजिकै रहेको होटेलमा पुगेर बसेका हुन् । एसपी अधिकारीले भने, ‘विमानस्थलबाट उहाँहरू सिधै होटेलमा गएको देखिन्छ ।’

क्यानडाबाट परिवारलाई खबर नै नगरी आएका दम्पतीले आत्महत्या गर्नुको कारण खुल्न नसकेको अनुसन्धानमा संलग्न अधिकृतहरू बताउँछन् । अनुसन्धानमा संलग्न एक जना अधिकृत भन्छन्, ‘परिवारका सदस्यहरू बेखबर छन्, हामी प्राविधिक कोणबाट आत्महत्या गर्नुको कारण खोज्दै छौँ ।’

उनीहरूको शव परीक्षणको रिपोर्ट आएको छैन ।