व्यवस्थापन सङ्कायमा टपर भट्ट सम्मानित
धनगढी, १२ मङ्सिर ।
व्यवस्थापन सङ्कायमा त्रिभुवन विश्वविद्यालयबाट देशभरिमै उत्कृष्ट हुन सफल धरणीधर भट्टलाई आज सम्मान गरिएको छ ।
कैलाली बहुमुखी क्याम्पस र स्वतन्त्र विद्यार्थी युनियनले उनलाई एक समारोहबिच सम्मान गरेको हो ।
सम्मान समारोहका प्रमुख अतिथि सुदूर पश्चिम प्रदेश सरकारका सामाजिक विकास मन्त्री मेघराज खड्काले भट्टलाई प्रशंसा पत्र सहित सम्मान गरे ।
समारोहका अतिथि पूर्व मन्त्री रमेश धामी, कैलाली बहुमुखी क्याम्पसका प्रमुख तोयराज भट्ट लगायतका अतिथिहरुले विद्यार्थी भट्टलाई बधाई दिए ।
कैलाली बहुमुखी क्याम्पसमा अध्ययनरत भट्टले ब्याचलर अफ बिजनेस म्यानेजमेन्ट (बिबिएम) कार्यक्रममा देशभरिमै उत्कृष्ट हुन सफल भएका थिए ।
भट्टले औसत ३.९५ जिपिए ल्याएर त्रिभुवन विश्वविद्यालय व्यवस्थापन संकायमा देशभरिमै उत्कृष्ट स्थान हासिल गर्न सफल भएको कैलाली बहुमुखी क्याम्पसका सहायक क्याम्पस प्रमुख डा.लोकबहादुर विष्टले जानकारी दिए ।
बिष्टका अनुसार भट्टले पहिलो सेमेस्टरमा ३.८८, दोस्रोमा ३.९६, तेस्रोमा ३.९८, चौथोमा ३.९९, पाँचौंमा ३.९४, छैटौंमा ३.९६, सातौंमा ३.८९ र आठौं सेमेस्टरमा ३.९८ जिपिए प्राप्त गरेका थिए ।
तपाईको प्रतिक्रिया