आगलागी हुदा धनगढी शहिद गेट छेउका तीन पसलमा क्षति

धनगढी, ७ पुस ।
आईतवार राति धनगढी उपमहानगरपालिका– ४ शहिदगेटस्थित मोवाईल ग्यालरीबाट फैलिएको आगोले तीन वटा पसलमा ठूलो क्षति भएको छ ।

आईतवार राति करीव ८ बजे समीर मोवाईल ग्यालरीबाट शुरु भएको आगलागीमा परी मोवाईल ग्यालरी पूर्ण रुपमा जलेर नष्ट भएको छ । ग्यालरीसंगै जोडिएका लवली टेलरिङ र अर्जुन आर्टसमा पनि क्षति क्षति भएको छ । लवली टेलरिङ आधा भन्दा बढि जलेको छ ।

आगलागी भएको २० मिनेटपछि धनगढी उपमहानगरपालिकाबाट आएको दमकलले आगो नियन्त्रणमा लिएको थियो ।
आगलागी हुदा समीर मोवाईल ग्यालरी बन्द थियो । वरीपरीका पसलहरु खुला रहेका कारण ग्यालरी भित्र आगलागी भएको स्थानीयले थाह पाए । र, दमकल बोलाए ।

समयमा दमकल नपुग्दा समीर मोवाईल ग्यालरी जलेर नष्ट भयो । र, अन्य दुई पसलमा समेत ठूलो क्षति भयो । ग्यालरीसंगै जोडिएको चक्र चन्दको घरको भित्तामा समेत आगोले क्षति भएको छ ।

यद्दपि दमकल आएपछि भने थप क्षति हुन नपाएको स्थानीय बासिन्दाले बताए । स्थानीय बासिन्दाले बन्द मोवाईल ग्यालरीमा विद्युत सर्ट भएर फैलिएको आगोले थप दुई पसलमा समेत क्षति पुगेको बताए ।

प्रहरीले आगलागी नियन्त्रणमा आईसकेको र क्षतिको विवरण लिने क्रम जारी रहेको जनाएको छ ।