सरकारी स्तरबाट ठूलो धनराशिको लोक दोहोरी प्रतियोगिता हुँदै

कैलाली । राष्ट्रिय युवा परिषद् कला साहित्य सञ्जालको आयोजना तथा संस्कृति समाज नेपालको सहकार्यमा भोलिदेखि सरकारी स्तरबाट ठूलो धनराशिको लोक दोहोरी प्रतियोगिता हुने भएको छ ।

भोलि र पर्सि हुने दोहोरी प्रतियोगिताको युवा तथा खेलकुद मन्त्री तेजुलाल चौधरीले एक कार्यक्रमकाबीच नेपाल पर्यटन बोर्ड भृकुटीमण्डपमा उद्घाटन गर्ने छन् ।

राष्ट्रिय स्तरका लाइभ दोहोरीका प्रखर १२ समूहहरू बिच प्रतिस्पर्धा हुने छ। कोसी, सगरमाथा, जनकपुर,बागमती, नारायणी, गण्डकी, लुम्बिनी, धौलागिरि, राप्ती,भेरी, कर्णाली र सेती काली गरी १२ समूहमा विभाजन गरिएको टोलीलाई कार्यक्रम स्थलमा गोला प्रथा मार्फत समूह निर्धारण गरिने आयोजक राष्ट्रिय युवा परिषद् अन्तर्गत कला, साहित्य सञ्जालका अध्यक्षमा राम प्रसाद अवस्थीले जानकारी दिए ।

देशमा विकराल बन्दै गएको बेरोजगारीको अवस्था, युवा पलायनले निम्त्याएको समस्या, मुलुकका समस्या,सम्भावना र संवृद्धिका विषयमा कला संस्कृति मार्फत उजागर गर्ने उद्देश्यले लोक दोहोरी प्रतियोगिता आयोजन गर्न लागिएको उनले बताए ।

बद्री पराजुली, सिता थापा, चन्द्र शर्मा, लगायतको टोली निर्णायक मण्डलमा रहने छन् । प्रतियोगिताको विजेताले टोलीले नगद १ लाख पाउने छन् भने दोस्रो हुने टोलीले ५० हजार, तेस्रोले १५ हजार र सान्त्वना हुने समूहले १० हजार रकम पाउने आयोजकले जनाएको छ ।

सरकारी स्तरबाट आयोजना गर्न लागिएको यो ठुलो राशिको प्रतियोगिता हो । सांस्कृतिक समाज नेपालका अध्यक्ष समेत रहेका राष्ट्रिय युवा परिषद् अन्तर्गत कला, साहित्य सञ्जालका अध्यक्ष अवस्थीले संस्कृतिका माध्यमबाट संवृद्धिको सन्देश दिन प्रतियोगिता आयोजना गर्न लागिएको जानकारी दिए ।