अमेरिकामा ट्रान्सजेन्डर खेलाडीलाई महिलाको खेलकुदमा भाग लिन प्रतिबन्ध

न्युयोर्क । अमेरिकी राष्ट्रपति डोनाल्ड ट्रम्पले सपथ लिने बित्तिकै उनले अमेरिकामा दुई लिंग (पुरुष र महिला) मात्र हुने बताएका थिए । ट्रम्पले अमेरिकामा बस्ने ट्रान्सजेन्डर र एलजीबीटी समुदायको समस्या बढ्ने संकेत गर्दै यस्तो निर्णय लिएका थिए । 

यसैबीच ट्रम्पले ट्रान्सजेन्डरहरूलाई अझ ठूलो झटका दिएका छन्। ट्रम्पले बुधबार एक कार्यकारी आदेश जारी गर्दै ट्रान्सजेन्डर खेलाडीहरूलाई महिलाको खेलकुदमा भाग लिन प्रतिबन्ध लगाएको बताए । न्युयोर्क टाइम्सका अनुसार डोनाल्ड ट्रम्पको यो आदेश त्यस्तोमा लागु हुनेछ, जो जन्ममा पुरुष थिए र पछि लिंग परिवर्तन गरेर महिला बनेका थिए । ट्रम्पले आफ्नो चुनावी प्रचारका क्रममा पुरुषलाई महिला खेलकुदबाट टाढा राख्नुपर्ने बताएका थिए ।

ह्वाइट हाउसका प्रेस सेक्रेटरी क्यारोलिन लेभिटले उक्त निर्णयले 'टाइटल आइएक्स' (महिला खेलहरूमा पुरुषहरूको खतरनाक र अनुचित सहभागिता समाप्त पार्ने ह्वाइट हाउसको कार्यकारी आदेश) को बाचा कायम राख्ने बताइन् । महिला अधिकारका लागि यो निर्णय उनले बताइन् । 

न्यु योर्क टाइम्सको रिपोर्टअनुसार २५ राज्यले ट्रान्सजेन्डर खेलाडीहरूलाई हाई स्कूल र युवास्तरमा महिलाहरूको खेलकुदमा प्रतिबन्ध लगाउने कानुनहरू पारित गरिसकेका छन्। 

हालै ट्रम्पले एक आदेश पारित गरेर अमेरिकामा १९ वर्षमुनिका व्यक्तिले लिङ्ग परिवर्तन गर्न नपाउने बनाएका छन् । 
ट्रम्पले एक विज्ञप्तिमा भनेका थिए, 'यो संयुक्त राज्य अमेरिकाको नीति हो, यसले कुनै पनि बच्चाको एक लिङ्गबाट अर्को लिंगमा तथाकथित परिवर्तनलाई आर्थिक, प्रायोजक, प्रवर्द्धन, सहयोग वा समर्थन गर्दैन, र यसले यी विनाशकारी र जीवन परिवर्तन गर्ने प्रक्रियाहरूलाई निषेध गर्ने वा सीमित गर्ने सबै कानूनहरू कडाइका साथ लागू गर्नेछ।'